Komandante Interino Polisia munisipiu Dili, Superintendente Asistente Euclides Belo hateten atuasaun Polisia dadaun ne’e tau liu prioridade ba kazu asedio seksual ne’ebe durante ne’e dalabarak liu akontese iha fatin publiku hasoru feto (foinsa’e) sira.
“Dadauk ne’e ami nia atuasaun foka liu ba ita nia mane sira ne’ebe hasai oin lulik ba feto Timor oan inklui mos ba ema estrangeirus iha fatin publiku,” nia hateten, iha Dili.
Nia dehan, hasai oin lulik hanesan hahalok immoral ne’ebe mak mane sira halo iha fatin publiku ba feto sira e ida ne’e krime tanba kontra lei.
“Ho hahalok ida ne’e halo inan feto sira sente la seguru e ida ne’e mak sai ami nia target operasaun,” nia dehan.
Portantu, nia mos husu ba Ministeriu Publiku atu toma atensaun ho seriu ba kazu asediu seksual ne’ebe husi PNTL, liu-liu ba suspeitu balun ne’ebe kaer no submete ona ba.
Iha parte seluk Diretor Ezekutivo Fundasaun Mahein (FM), Joao Almeida hateten krime asediu seksual ne’ebe akontese iha fatin publiku durante ne’e, seidauk hatene kauza ne’ebe lolos.
“Iha semana hirak liu ba, iha kazu kona ba kazu asediu sexual fatin publiku maibe tanba saida maka ida ne’e akontese, ita seidauk hatene ho lolos,” nia dehan.
Nia mos husu ba inan feto sira ne’ebe sai vitima husi hahalok ida ne’e, tenke hato’o keixa ba autoridade polisia, nune’e bele identifika suspeito sira.
Portantu, nia dehan vizibilidade polisia importante liu iha fatin publiku, monitoriza nune’e hahalok hanesan ne’e labele akontese iha fatin publiku, polisia tenke mantein seguransa iha fatin hotu.
