Diretor Ezekutivu Ospital Nasional Guido Valadares (HNGV), Aniceto Barreto hateten kondisaun edifisio (uma) ospital sai ona knu’uk ba barata tanba ne’e presiza tempu atu halakon totalmente barata iha ospital nasional.
Nia dehan, agora dadaun governu liu husi Ministerio da Saude hamutuk ho ospital kontratu ona kompania hodi uza kimiku espesifiku atu kombate barata, maibe presiza tempu atu totalmente lakon.
“Kona ba ambiente mudansa ita halo dadauk ona, aimoruk ita tau ohin, labele kombate kedas ohin, ne’e ita bosok malu tanba barata ne’e tinan naruk ona moris iha laran, konstrusaun uma ne’e sai tiha kunu’uk ba barata, ne’e lori tempu,” nia hateten liu husi konferensia imprensa iha ospital Bidau, Dili.
Nia hateten, asaun ne’ebe agora dadaun hala’o iha HNGV ne’e sufsiente atu responde minimu redus numeru barata iha ospital, liu –liu sala sira no presiza hadia konstrusaun uma atu barata bele lakon totalmente.
Iha parte seluk, Membru Parlamentu (MP) Silvino Adolfo Morais hateten kondisaun infra-estrukturas ospital nasional iha nesesario atu halo alargamentu tanba espasu la to’o atu responde ba iha nesesidade, liu –liu numeru pasiente kada loron aumenta.
“Hau hanoin ospital ne’e presiza halo ona alargamentu ba nia edifisio sira ne’e,” nia hateten.
Alende ne’e, nia mos preokupa ho ambiente ospital ne’ebe laiha higiene tanba iha sala laran barata barak iha liur (areador) du’ut nakonu, ne’ebe fo oportunidade ba susuk, barata moris barak liu tan.
Nia hateten, kondisaun sira seluk ne’ebe presiza manutensaun maka haris fatin tanba haris fatin barak maka laiha kondisaun.
