Diretor Nasional Aksaun Sosial Eskolar, iha Ministerio Edukasaun, Belchior Maria Almeida Barros Guerra, hateten programa merenda eskolar to’o agora seidauk la’o tanba orsamento laiha.
Nia dehan, programa merenda eskolar ne’e implementa depende ba orsamento do estado.
“Iha fulan Janeiro nian, ita laiha orsamento hodi preve ba programa merenda eskolar,” nia hateten, iha Dili.
Nia dehan, kalendario ano letivo 2019 hahu ona iha dia 7 de Janeiro ne’e iha eskola sira, halo inscrisaun, halo orientasaun fase sira ne’e liu hotu ona, iha dia 14 ne’e normalmente atividade do ensino la’o hotu ona.
Nia dehan, Ministerio Edukasaun sei esforsu fo informasaun ba eskola sira katak merenda eskolar lapara, sei hein orsamento do estado hodi kontinua fali.
“Ita hotu hatene, katak objetivo husi programa merenda eskolar ne’e atu hasae volume estudante iha eskola, maibe dadaun ne’e paradu tanba laiha orsamentu,” nia dehan.
Entretanto Sekretario Nasional Rede Edukasaun Timor-Leste Coalition for Education (TLCE), Jose Monteiro hateten merenda eskolar ne’e hanesan atividades extra ida ne’ebe Ministeiro Edukasaun propoin atu bele hasa’e taxa partisipasaun estudante iha aula laran, hamenus numero abandona iha eskola.
“Ita haree katak agora dadaun governo la’o ho orsamentu dua desimo ba Janeiro nian, espera katak Fevereiro labele kontinua tan ho dua desimo, atu nune’e programa merenda eskolar bele la’o fali,” nia esperansa.
Nia dehan, osan ba merenda ekolar to’o agora seidauk iha tanba ho orsamentu duadesimola koloka ba merenda eskolar.
“Ita tenke kompriende tanba ita nia situasaun mak nune’e,” nia dehan.
Nia mos, husu ba professores ho estudante sira bele kompriende situasaun ida ne’e, tenke honesto katak osan laiha duni.
Iha sorin seluk Diretor da Eskola Filial Rumbia Abilio Pereira da Conceicao hateten maske merenda eksolar seidauk la’o hafoin tinan foun maibe estudante sira nafatin iha vontade tuir aula.
“Partisipasaun ami nia estudante sira la diminui maske laiha merenda eskolar,” nia dehan.
