Diretor Nasional Farmasia no Medikamentus iha Ministerio da Saude, Delfim da C. X Ferreira hateten iha dekretu lei no 12/2004 kona ba regulamentu farmasia hakerek klaru aimoruk hotu ne’ebe tama mai rai laran tenke hakerek ho lingua official (Tetum, Portugues) no lingua Internasional (Ingles).
Nia rekonese, aimoruk ne’ebe importa mai barak liu iha lian Indonesia, Ingles no iha mos Cina lian, portante maioria aimoruk hirak ne’e importa husi Indonesia, India, Banglades, Singapur no Australia.
“Ami fo ona karta ba importador sira atu pasa informasaun sira ne’ebe ho lingua Cina ba lingua Ingles no Portugues diak liu tan,” nia hateten iha salaun Ministerio Saude Palacio da Sinzas Kaikoli, Dili.
Nia dehan, sira mos husu ona embaixada Cina atu fasilita tradusaun ba iha lia fuan sira ne’ebe hakerek iha aimoruk ho lingua Cina ba Ingles, Portugues ou Tetum.
Nia informa, agora dadaun iha kompania hamutuk 16 maka hetan lisensa importador ba iha medikamentus no husi numeru ne’e kompania husi Cina hamutuk hat.
Nia hateten, ba oin kompania sira la kumpri maka sei fo sansaun hanesan koimas ho montante $100, $200,$500 to’o $ 5mil to’o $20 mil resin.
Antes ne’e, Deputado Aderito Hugo preokupa aimoruk hakerek ho lingua Cina barak maka sirkula hela iha merkadu tanba bele prejudika ema nia saude.
Nia dehan, governu iha obrigasaun atu regularize setor privado sira ne’ebe presta servisu atendimentu saude ba komunidade sira iha rai laran tanba governu maka orgaun regulador.
“Hau ba sosa aimoruk, hau lahatene tanba hakerek ho lingua Cina, hau presiza husu esplikasaun ba iha apoteker sira, maibe apoteker mos koalia tetun lahatene, ita husik hela deit ne’e labele,” nia hateten.
