Prezidente Asosiasaun Parteira Timor –Leste (APTL), Marcia Soares hateten asosiasaun halo hela advokasia ba Ministerio da Saude no parseirus hodi fo oportunidade ba parteiras nain 300 atu hasai estudu iha nivel minimu diploma 3 tanba agora dadaun sira iha nivel diploma 1 nafatin, maske sira servisu kleur ona.
Nia dehan, asosiasaun iha pilar importante tolu hanesan edukasaun, regulamentu no asosisaun, maibe prioridade importante maka edukasaun atu hasa’e kuinesementu no abilidade parteira sira nian hodi presta servisu atendimentu ne’ebe diak ba inan sira.
Kona ba kapasitasaun, nia dehan iha parte rua : primeiru formasaun ba kandidatu parteira sira ne’ebe estuda hela iha universidade no segundu maka formasaun kontinuidade ba parteiras ne’ebe halo ona servisu iha fasilidade saude.
“Prioridade importantet ne’ebe ami haree hela maka halo advokasia ho governu atu apoiu ita nia parteira diploma 1 iha tempu Indonesia nain 300, oinsa eleva sira nia nivel edukasaun minimu to’o diploma 3, ne’e maka ami nia esforsu agora dadaun,” nia hateten iha Timor Plaza, Dili.
Nia dehan, hanoin ida ne’e sira rekomenda ona ba Ministerio da Saude bainhira halo diskusaun kona ba planu estrategiku nasional rekursu humanu seitor saude nian foin lalais ne’e.
Nia hatutan, iha governu anterior Ministerio da Saude asina ona akordu iha ho Universidade Nasional Timor –Leste (UNTL) atu fo oportunidade ba iha profesional suade sira ne’ebe nivel edukasaun minimu atu eleva minimu to’o lisensiatura, maibe akordu ida ne’e seidauk implementa tanba mudansa governu.
Nia informa, total parteira ne’ebe registradu iha asosisaun hanesan membrus to’o iha fulan Julho tinan 2018 hamutuk ema nain 803. Husi numeru ne’e 90% servisu iha fasilidade suade publika no seluk iha seitor privado.
Iha parte seluk, Diretor Ezekutivu Instituto Nasional Saude (INS) Antonio Bonito hateten governu ho apoiu husi agensia dezenvolvimentu sira kontinua fo formasaun ba parteira sira kona ba partu seguru no estandarizasaun EMoC, liu –liu atendimentu ba partus ne’ebe ho komplikasaun.
Nia dehan, tinan ida ne’e 2018, fo ona formasaun ba iha parteira lubuk ida husi munisipios kona ba matadalan atendimentu ba partus ho komplikasaun sira no sei kontinua iha tinan oin 2019.
“Inan barak mate bainhira partus no bebe mate tanba parseiru sira suporta ita halo formasaun ida ne’e hodi eleva konesementu parteira no medikus atu atende inan sira ne’ebe partus ho komplikasaun,” nia hateten.
Nia hatutan, objetivu ikus husi formasaun sira ne’e maka inan hotu ne’ebe partus iha fasilidade saude labele mate no bebe sira ne’ebe moris labele mate.
