Jestor Forum Komunikasaun Joventude Partidaria (FKJP), Joao do Nascimento husu ba governu tenke kria lei ida hodi regula tarifa mina ho kareta nian tanba dalabarak liu kondutor transporte publiku (mikrolet) sira hasa’e tarifa bainhira folin mina iha merkadu sa’e.
“Tanba ita haree kada tinan problema ne’e sempre akontese ba povu ki’ik sira iha Timor-Leste, hau koalia asunto ne’e refere liu ba alin estudante sira tanba bainhira exame ona mikrolet sira halo ona (mogok) la halai, razaun dehan selu la los,” nia hateten, iha Dili.
Alende ne’e, nia mos husu ba mikrolet nain sira tenke iha hanoin ne’ebe bele kontribui ba dezenvolvementu rai no povu ida ne’e.
“Labele hanoin deit atu hetan lukru ne’ebe bo’ot, tenke kolabora ho estadu atu partisipa dezenvolvimentu rai ida ne’e liu husi asaun-asaun sira ne’ebe mak simples,” nia sujere.
Nia hato’o kestaun ne’e relasiona ho mikrolet 05 ho 06 ne’ebe foin lalais ne’e halo asaun mogok (la halai) iha momentu estudantes sira ezame tanba ho razaun pasajeirus selu la loos.
“Bele hasa’e maibe tenke haree ho ema nia nesesidade no kapasidade ne’ebe iha,” nia hateten.
Tanba tuir nia, bele mos kondutor sira hatun tarifa mikrolet $0,15 sentavus (ba estudantes) no $0,25 ba publiku bainhira folin mina tun fali. Maibe realidade ne’e sira la hatun e kontinua selu tuir tarifa ida ne’e maske folin mina tun.
“Hau nudar representa joven, husu ba mikrolet nain sira husi 01 ate 12 bele tur hamutuk to’ok koalia kona ba asuntu ida ne’e, asuntu ne’e mikrolet nain mak hatene, kondutor so hatene buka osan deit,” nia sujere.
“Hau hanoin, ministerio relevante presiza kria lei kona ba asuntu ne’e, kria tiha lei tenke implementa mos sansaun,” nia hateten.
Entretanto Membru Komisaun ba asuntu Konstitucionais e Justica Parlamentar, Adriano do Nascimento konkorda ho rekomendasaun ida ne’e nune’e bele regula emprezariu kareta sira labele hasa’e tarifa kareta arbiru deit.
“Hau aseita sira nia rekomendasaun, ita tenke iha lei atu regula atu nune’e emprezario sira haree ensera politika ruma mosu, sira hasa’e ona sasan nia folin tuir sira nia hakarak,” nia konkorda.
NIa espera, depois de diskusaun orsamentu do estadu remata, govenru ho parlamentu bele ona konsentra ba asuntu ida ne’e tanba ida ne’e importante.
“Tanba ida ne’e hanesan preokupasaun ida, governu ida ne’e tenke buka dalan atu rezolve tanba banhira mina folin sa’e ne’e impaktu bo’ot liu-liu povu ki’ik,” nia hateten.
Portantu, bainhira Jornalista TDW koko konfirma asuntu ne’e ba iha Diresaun Nasional Transportes e Terestre (DNTT) maibe laiha resposta to’o notisia ne’e tun.
