Diretor Jeral iha Ministerio Edukasaun, Antoninho Pires hateten ministeriu kontinua hakerek no produs livrus ensino sekundariu jeral nian iha Portugal tanba sei tuir kontratu antigu nian (sira maka hakerek no sira maka produs).
Maibe nia dehan, livro balun deit mak hakerek no produs iha Portugal e materia balun hakerek no produs iha Timor.
“Ita nia kurikulum ne’ebe mak ita kontrato ba, katak materia balun tenke hakerek iha rai liur depois haruka mai ita aprova tiha maka sira halo produsaun, balun ita hakerek iha Timor produs mos iha Timor,” nia hateten, iha Dili.
Nia dehan, livro ne’ebe mak sira produs iha rai liur ne’e ba Pre-Sekundario no Sekundario ba materia espesifiku Siensai Sosiais mak Geografika, Historia, Temas Literatura, Sosiologia no Naturais, Matematika Biologia, Fizika, Quimica.
“Maibe iha 2017 mai ne’e, ita la hakerek no la halo ona produsaun iha rai liur,” nia dehan.
Tanba ne’e, nia dehan ba oin sei la hakerek no produs tan livros iha rai liur maibe buat hotu (hakerek no produs) sei halo iha Timor.
Entretanto Koordenador Sentro Impresaun Comoro Joao Mau Pelu hateten ba Ensino Baziku sira produs deit livro de apoio no livro seluk sira laiha direito atu produs.
“Livros kona ba materia Siensia Naturais hanesan Matematika, Fisika, Geologia, Biologia no Quimika no ba Siensia Sosiais nian maka Geografika, Sosiologia, Historia Economia ne’e ami laiha direito atu produs, ida ne’e so bele produs iha rai liur,” nia hateten.
“Maibe ba materia Jeral ba sNekundario sira kuaze ita mak hakerek no produs.”
Nia dehan, durante ne’e sira produs ona livrus manual ba Ensino Sekundario Jeral ho Vokasional hamutuk livrus 200 mil resin.
