Koordenador Apoiu Fundu Sosiedade Sivil iha Gabinete Primeiru Ministru, Joaquim Freitas hateten tinan ida ne’e (2018) organizasaun non governmental 27 mak hetan asesu ba fundus ne’e hodi hala’o servisu.
Nia dehan, iha organizasaun 50 resin mak hatama proposta, maibe tanba limitasaun orsamentu, NGO 27mak passa no maioria kontinuasaun ba servisu ne’ebe hala’o ona.
Nia hateten, sira fo prioridade liu ba iha projetu fisiku sira, hanesan konstrusaun Igreja Aimutin, Igreja Becora, Igreja Covalima no Igreja Bobonaro.
“Apoiu ne’e fulan ida nian, depois ne’e sira tenke hatama relatorio lai foin prosesu fali fulan oin nian, tanba ne’e se sira la disiplina, sira bele lakon oportunidade,” nia hateten
Nia hateten, ba NGO ne’ebe nia proposta la passa, sira rai hela ba governu foun mai atu konsidera, tanba orsamentu ba tinan ida ne’e nian iha deit $300 mil resin.
Nia informa, hahu tinan 2008 to’o mai agora governu aloka ona orsamentu ho montante $90 miloens hodi apoiu ba NGO sira no nia rezultado mak iha igreja barak iha munisipio ne’ebe konsege hadia ona.
Enkuantu, Diretora organizasaun Fundasaun Alola, Alzira Reis hateten tinan hirak liu ba sira hetan apoiu fundus husi governu liu husi fundu sosiedade sivil no Ministerio Solidaridade Sosial atu halo programa advokasia no empoderamentu feto.
“Tinan ida ne’e ami lahetan, tanba orsamentu duadesimu ne’e la kobre ba iha parte prevensaun maibe ba los iha fornesedor servisu sira,” nia hateten.
Nia dehan, tinan ida sira gasta minimu $1.6 miloens ba operasional programa hotu nian, tanba ne’e situasaun ida ne’e fo impaktu ba servisu organizasaun nian maske ki’ik.
Nia informa, tinan ida ne’e (2018) sira la hetan husi MSS, maibe sira hetan $15 mil husi fundu sosiedade sivil atu halao atividade programa advokasia.
Iha parte seluk, Diretora Organizasaun Forum Komunikasaun Feto Timor –Lorosa’e (FOKUPERS), Marilia Alves hateten situasaun ida ne’e fo impaktu bo’ot tebes ba servisu atendimentu ba vitima sira iha uma mahon tanba 90% orsamentu mai husi governu.
Nia dehan, kada fulan ida sira gasta mais ou menus $12 mil hodi fo asistensia ba vitima sira iha uma mahon Dili, Maliana no Suai.
“Orsamentu dua desimu fo impaktu tebes ba servisu uma mahon nian iha fulan Janeiru to’o Fevereiru liu ba ami iha dificuldade tebes ba orsamentu,” nia hateten
Nia dehan, iha fulan Marsu ne’e sira asina ona MoU ho Ministerio Solidaridade Sosial no aloka $8 mil resin hodi hala’o servisu asistensia ba vitima, maibe sira tenke halo relatorio kada fulan hodi nune’e nafatin hetan apoiu.
