Durante periodu kampanha, kazu krime eleitoral hat mak konsege rejistu iha Komando Polisia Munisipiu Dili.
Komandante Polisia Munisipio Dili, Superintendente Xefe Pedro Belo hateten desde kampaña eleitoral ba elisaun antisipada hahu to’o agora, Komandu Munisipiu Dili rejistu kazu krime hat.
Nia dehan, husi kazu hirak ne’e ida mak ema balun hatun Bandeira Partido Koligasaun Aliansa Mudansa ba Progresu (AMP) nian iha Bidau, Toko Baru.
“Kazu ne’e iha ona desizaun Tribunal, no fo ona Termus Identidade Rezistensia (TIR) ba suspeito, maibe kazu ne’e seidauk remata nia prosesu, sei kontinua la’o,” nia hateten, iha Dili.
Nia hatutan, kazu seluk ida akontese iha Aitarak laran, ema balun hatun mos bandeira AMP nian, kazu nee oras ne’e dadaun Polisia indentifika no bolu ona ema hamutuk 10 resin, no tempu badak sei intrega ba Ministeriu Publiku.
Entretantu kazu ida seluk akontese iha Santa Kruz, iha madrugada sira sunu mos bandeira AMP, e prosesu ba kazu ida ne’e oras ne’e la’o hela.
“Ami nafatin rekolha lai informasaun ba suspeito sira ne’ebe mak momentu ne’e halo asaun, no oras ne’e dadauk kompletu ona ami prepara depois intrega ba Ministerio Publiku, atu bele haree kontinuasaun ba kazu ne’e,” nia dehan.
Nia informa, akontese ida tan iha dia 30 Abril dadersan, iha area Hera nian ne’ebe mak ema balun hatun bandera AMP nian, tesi kotu tiha nia talin no lori lakon tiha bandera ne’e.
“Iha Hera akontese iha madrugada, hau foin simu informasaun entaun hau haruka kedan ekipa ba to’o fatin akontesementu hodi rekolha informasaun, servisu nafatin ho komunidade sira atu bele fo informasaun, nune’e ita bele halo prosesu,” nia dehan.
Nia dehan, Timor-Leste adopta sistema demokratiku, tanba ne’e ema hotu iha liberdade atu hili partidu politiku ne’ebe deit, la’os atu ameasa malu, sunu ema seluk nia bandera, ida ne’e krime.
“PNTL la tolera atitude ne’ebe mak impede demokrasia, ami sei la fo fatin para sira halo ida ne’e, ami sei hatun ami nia ekipa tomak hodi buka informasaun para bele deskobre ema sira ne’ebe mak halo violensia hasoru ema seluk,” nia dehan.
Entretanto Observador Politiku Camilo Ximenes hateten, tempo ida agora ne’e kampanha sosiedade mos akompanha, terseira pesoa ne’e koko atu kria situasaun ne’ebe la diak iha komunidade.
Nia dehan, kampanha lider politiku sira kuaze lor-loron han malu, husi ida ne’e ema terseira pesoa sempre aporoveita tiha situasaun ne’e.
“Ita hatene katak, iha partido balun ho ema balun deskonehesido ne’ebe mak destroy atributo partido balun nian,” nia dehan.
Tanba ne’e, nia dehan partido politiku sira presiza halo edukasaun politika ida ne’ebe mak diak, atu nune’e sira nia militantes labele ba destroy fali atributu partido seluk nian.
“Ita labele temi deit demokrasia maibe tenke hatene tuir valor demokrasia ne’e mak saida, kuando ita halo kompetisaun ita hamrik, tenke iha bandeira ka atributo ida, bainhira sira manan sira orguilho tanba iha kompetisaun ne’ebe mak diak,” nia dehan.
Ne’ebe, nia dehan ema balun ne’ebe mak la satisfas ho kampanha lider politiku sira, ida ne’e normal, tanba ida ne’e sira nia direitu.
“Ita ne’ebe mak militante no simpatizante bai-bain foti ida ne’e sai hanesan lisaun ida, atu nune’e ita bele aprende, halo analiza oinsa mak atu intrepreta los atu bele hetan rezultado diak,” nia dehan.
Nia sujere, mos ba partido sira tenke hadia sira nia komunikasaun politika entre partido sira ne’e no tenke halo sosializasaun ne’ebe mak diak ba nia militante sira, atu nune’e labele mosu konflito.
