Ministerio Edukasaun loke ona programa koperativo kona ba kredito nian iha eskola sekundario neen (6), iha munisipiu Bobonaro no Dili.
Diretor Jeral iha Ministerio Edukasaun (ME), Antoninho Pires hateten programa koperativo ne’e ho objetivu atu motiva atu liu husi ida ne’e bele hamosu fali atividade seluk ne’ebe fo benefisiu ba sira.
“Koperativo ne’ebe bele hamosu buat seluk hanesan imprestimos, tau hamutuk osan atu nune’e bele halo kredito,” nia hateten, iha Dili.
Programa koperativo ne’e, nia dehan hanesan parte ida atu dezenvolve ba vida ekonomia iha sosiedade ne’e rasik.
“Ami halo ona pelutajen ba iha eskola sekundario sira, numero seidauk bo’ot tanba foin iha eskola 6,” nia dehan.
Alende ne’e, nia dehan loke iha eskola sira ne’e tanba iha eskola iha sosiadade edukativo, tanba ne’e mak presiza programa koperativo ne’e hodi bele ajuda nia membro sira.
Fundos ba koperativa ne’e, nia dehan tenke mai husi membro sira, tau hamutuk osan depois sai fali funan no sira bele uza ba atendimento ida, tanba ne’e mak Ministerio Edukasaun loke iha eskola atu estudante sira bele hatene.
“Ami hein katak to’o tinan oin ami bele hetan relatorio kompleto ba eskola ne’ebe mak ami loke ona programa koperativo,” nia esperansa.
Entretanto Sekretario Nasional rede edukasaun Timor-Leste Coalition for Education (TLCE), Jose Monteiro hateten, programa ne’e diak tanba bele ajuda estudante sira bele hatene oinsa tau osan halo imprestimos nian.
“Hau agradese ba inisiativa ida ne’e, tanba liu husi programa ida ne’e loke estudante sira nia hanoin atu halo imprestimos,” nia hateten.
Tanba ne’e, nia husu ba Ministeriu Edukasaun atu loke mos programa hanesan iha eskola seluk iha munisipiu sira ne’ebe seidauk, iha futuru.
