Sekretario Estado Joventude no Trabalho (SEJT), Nivio Magalhães hateten trabalhadores 180 mak preparadu no iha tempu badak governu sei haruka sira ba servisu iha Australia.
Nia dehan, prosesu halo teste ba trabalhador sira ne’e hotu ona e agora hein deit ona rezultadu teste ne’e.
“Data atu ba mak seidauk fiksu, sei hein rezultadu teste,” nia hateten, iha Dili.
Vaga atu ba servisu iha Australia ne’e, nia dehan ne’e loke ba publiku e laiha sistema familiarizmu iha prosesu rekrutamentu, “kompetensia ba ema hotu, la’os ba familia deit,” nia dehan.
Nia dehan, rezultadu teste mak desidi sira ba ou la’e, sekuandu pasa iha teste entaun nia bele ba servisu iha Australia.
“Vaga ne’e ami loke livre ba se deit, tantu foho oan ka sidade oan, ami la haree ba ida ne’e, oportunidade ba Timoroan hotu, se mak iha interese bele mai aplai,” nia dehan.
Iha parte seluk kandidatu trabalhador Bernardo Quintão hateten nia apply ba vaga ne’e iha kedan Janeiru 2016 e to’o Abril mak bolu ba teste.
“Ami teste primeiru ne’e hamutuk 1500, hau laliu iha momentu ne’eba, sira ne’ebe liu teste ba iha tinan 2017,” nia hateten.
“Ami sira ne’ebe test la liu ne’e, sira haruka ba tuir kursu Inglesh iha fati-fatin, hau kona SOLS maibe tuir kursu la hotu tanba orario hanesan ho eskola nian, ne’ebe la tuir to’o hotu.”
Nia dehan, foin lalais ne’e SEJT telefone fali sira (sira ne’ebe uluk la pasa) hodi mai tuir fali teste e teste halo direitamente husi kompania nain husi Australia.
“Sira dehan, sira presiza tan ema ba servisu iha sira nia kompania,” nia haktuir.
Total trabalhador sira ne’ebe foin dadauk tuir fali teste ne’e hamutuk 180, sira tuir teste iha dia 05-06 de Abril de 2018, teste mak hanesan matan, fiziku, hili ai-musan, forsa ne’ebe tuir kedas ho teste lian Ingles.
“Ami hein deit ona teste saude, se teste saude ne’e hotu, bele asina kontratu ho kompania, kompania tomate nian,” nia dehan.
