Organizasaun Movimentu Feto Foinsa’e (MOFFE) no CAUCUS “Feto Iha Politika” dezenvolve strategia foun fo kapasita feto foinsa’e sira ne’ebe involve aan ona iha partidus politiku atu prepara sira sai politiku ne’ebe kualidade no sensibilidade jeneru ba futuru Timor –Leste nian.
Diretora MOFFE, Yasinta Lujina hateten objetivu husi formasaun ida ne’e atu haforsa konesementu no abilidade foinsa’e feto sira nian kona ba lideransa atu sira partisipa diak liu tan iha foti desizaun iha partidu laran.
Alende formasaun lideransa, nia dehan hasa’e mos sira nia konesementu kona ba igualidade jeneru atu tulun sira promove igualidade jeneru iha partidu laran, tanba realidade iha partidus politiku seidauk iha balansu jeneru ba posisaun xave sira.
“Hau hanoin forsa importante ida iha partidu laran mak joventude sira, maibe dala barak ladun fo atensaun iha partidu laran tanba sira seidauk iha esperiensia, konesementu diak e sempre koalia iha publiku ne’e ema adulto,” nia hateten iha Fatuhada, Dili
Nia hateten, strategia ne’ebe sira iha mak sei promove profile joventude sira iha partidu laran ba publiku, atu publiku mos hatene joven nia involvimentu iha no sira iha abilidade.
Nia hatutan, materia ne’ebe partisipante sira hetan mak sistema eleitoral, prosesu elisaun, papel no knar partidu politiku, demokrasia, boa governasaun, leis liu –liu lei partidu politiku nian, orsamentu sensivel jeneru no auditorio social.
Alende ne’e, materia adisional sira hanesan tekniku halo kampanha, koalia iha publiku no debates publiku atu forma sira nia mentalidade no fiar an hato’o ideias iha publiku.
“Ita espera, feto sira ne’ebe ita prepara bele preparadu atu iha kongresu partidu sira halo pakote no pronto atu kompete, tanba realidade mane halo pakote feto kompleta deit entaun estrutura maximu partidu feto ida ou rua deit, entau ita hakarak muda ida ne’e,” nia esperansa.
Nia hateten, formasaun hala’o durante loron hat (10-14) no partisipantes hamutuk 34 husi partidu politiku 14 hanesan Partidu Libertasaun Popular (PLP), Partidu Congresu Nasional Rekonstrusaun de Timor (CNRT), Partidu Demokratiku (PD), Partidu Kmanek Haburas Unidade Nasional Timor Oan (KHUNTO), Partidu FRETELIN, Partidu Frente Mudansa, Partidu Dezenvolvimentu Nasional (PDN), Partidu Esperansa Patria (PEP), Partidu UDT, Partidu Undertim, Partidu PDC, Partidu CASDT, Partidu PSD no kada partidu ema nain tolu.
Entretantu, eis Ministra Solidaridade Sosial (MSS) iha governu anterior Maria Domingas Alves Micato enkoraja feto foinsa’e sira atu buka aprende no hakbi’it aan hodi partisipa iha prosesu dezenvolvimentu tuir profisaun ne’ebe sira hili.
Nia dehan, partisipa iha vida politika ne’e direitu konstitusional ba sidadaun hotu, signifika feto no mane ne’ebe ho idade 17 ba leten iha direitu atu involve an iha vida politika.
“Hein katak ,sira uza direitu ne’e ho didiak, buka aprende diak liu tan hakbi’it esperiensia ne’ebe iha no bainhira involve ona iha politiak tenke hola desizaun ne’ebe asegura sidadaun feto no mane nia moris diak hanesan,” nia espera.
Nia dehan, tempu agora iha ona mekanismu oioin atu fo oportunidade ba feto sira atu involve an iha setor hotu, importante esforsu an aprende nafatin loron ruma sei sai politiku ne’ebe diak.
Iha parte seluk, reprezentante partisipante Zela Expostu Amaral agradese ba organizasaun rua ne’ebe fo ona oportunidade ida ne’e ba sira atu haklean sira nia konesementu ba topiku importante sira.
Nia dehan, materia (informasaun) ne’ebe sira hetan sei fahe fali ba iha foinsa’e no feto maluk sira seluk iha partidu laran, hamutuk hodi promove diak liu tan partidu ba oin.
“Diskriminiasaun sempre akontese iha partidu hotu, tanba ne’e hau hakarak aprende no konese buat ruma hodi halo mudansa ida ne’e,” nia hateten
Nia dehan, tempu agora involve iha partidu politiku ho idade joven la’os atu ukun, maibe aprende no prepara aan ba futuru.
Nia hateten, ho informasaun sira kona ba jestaun orsamentu bele ajuda sira halo planu orsamentu ne’ebe diak atu fo kapasitasaun ba foinsa’e sira no feto sira iha partidu laran.
