Asosiasaun Dentaria Timor –Leste (ADTL) servisu hamutuk ho Organizasaun Mundial Saude (OMS) organiza seminar sientifiku kona ba saude oral hodi hasa’e konesementu universitario sira nian kona ba kuidadu saude oral no tratamentu sira iha Timor –Leste.
Prezidente ADTL, dotora Teresa Antonio Madeira Soares hateten seminar ida ne’e hanesan mekanismu ida hodi hasa’e konsementu no komprensaun universitario sira liu –liu kandidatu professional saude sira antes hala’o knar hanesan professional saude iha terenu.
Nia dehan, partisipante iha seminar ho tema oinsa professional saude oral sira bele hadia oral iha Timor –Leste ne’e mai husi estudante dentaria Universidade Dili, parteira, emfermagen no medicina jeral husi Universidade Nasional Timor –Lorosae (UNTL) ,atu sira bele hatene oinsa fo atendimentu ba pasiente ho holestiku, la’os nehan deit.
“Kapasita diak liu tan ita nia pesoal saude iha area saude oral nian, atu sira mos ajuda diak liu tan hasa’e kondisaun saude iha Timor –Leste,” nia hateten iha salaun UNDIL, Balide.
Nia hateten, saude oral ne’e la’os nehan deit maibe ibun laran tomak inklui garganta, e problema ne’ebe barak liu iha Timor mak labarik sira nehan lakon sedu liu.
Survey DMF (nehan laiha no nehan lakon) ba labarik idade eskola iha Dili, ne’ebe hala’o iha tinan 2012 kuaze labarik 3.54 mak problema nehan, liu –liu nehan aat no lakon ona. Enkuantu iha tinan 2014 Ministerio Saude halo fali survey ki’ik ida iha Dili no numeru ne’e sa’e ona ba iha 4.32.
Tanba ne’e, nia sujere atu Ministerio Saude halo peskiza nasional ida kona ba saude oral iha Timor –Leste hodi bele identifika kauza labarik sira nehan aat no lakon iha idade ki’ik hodi bele halo asaun prevensaun ne’ebe efetivu atu bele responde ba situasaun ida ne’e.
Iha parte seluk, estudante finalist enfermagen dentaria UNDIL Cerzia Soares Pinto hateten seminar sentifiku ne’e importante tebes ba sira hanesan finalista tanba iha referensia foun ba sira husi espesialista Japaun nian.
Nia dehan, informasaun interesante ne’ebe sira hetan mak papel professional saude nian apoiu saude oral iha Timor –Leste no tratamentu sira ne’ebe disponivel iha rai laran.
“Ami kontente, tanba asosiasaun bele organiza seminar ida ne’e mai ami ne’ebe estuda hela saude oral tan ne’e informasaun sira ne’e importante tebes mai ami,” nia hateten.
Entretantu, estudante enfermagen UNTL Atanacio da Costa Flores preokupa tanba persentagen labarik nehan ular no at aas tebes iha Timor –Leste.
Tuir nia, numeru nehan at aas tanba governu seidauk fo prioridade ba iha edukasaun, promosaun saude oral iha Timor –Leste no labarik sira konsumu midar mak barak liu.
“Fokit nehan la’os solusaun ne’ebe diak, maibe governu presiza hanoin sistema ida hodi rezolve liu husi hasa’e konesementu komunidade sira nian ba iha saude oral,” nia hateten.
Nia sujere, ba ADTL atu kontinua organiza seminar sentifika sira hanesan ne’e ba estudante sira nia konesementu no kapasidade, nune’e bele hatutan informasaun sira ne’e ba iha komunidade.
