Xefe Departementu Agua no Saneamentu Munisipiu Dili, Francisco Xavier Pereira hateten suplai bee moos iha bee matan balun ne’ebe durante ne’e distribui bee ba iha komunidade sira iha sidade laran hahu menus, tanba mudansa klimatika (bailoro naruk).
Kauza husi ida ne’e, nia dehan bairo balun hanesan Taibesi, Becora, Aimutin no Tasi tolu hahu infrenta problema menus bee moos, tanba sira hetan bee moos husi bee matan ne’ebe fora husi area urbana nian.
“Tempu bailoro ne’e bee komesa menus, tanba bee ne’ebe agora atende ba iha sidade Dili ne’e bee matan mai husi foho,” nian hateten via telefone.
Tuir nia, bee matan hahu menus tanba mudansa klimatika ne’ebe akontese iha rai laran inklui mos tanba komunidade sira tesi ai arbiru iha foho lolon sira ne’eba.
Ho situausan ida ne’e, nia dehan hakarak ga lakohi sira tenke halo orariu hodi fornese bee moos ba iha komunidade sira iha vila laran, hodi ema hotu bele asesu ba bee moos.
“Ami tenke fahe oras, ezemplu loron ida ba area A no loron seluk ba area B nian, nune’e populasaun hotu bele asesu ba bee moos,” nia afirma.
Kona ba durasuan tempu, nia dehan depende ba iha total populasaun iha kada bairo ne’ebe iha, se iha bairo ida nia populasuan barak liu, “entaun ami loke bee kleur oituan,” nia dehan.
“Oferese 24 oras ne’e labele, tanba bee ne’ebe agora iha ne’e nia digit tuun ona. Bairo balun sira hetan bee moos oras ida, rua ou loron rua dala ida, ida ne’e maneira ida para komunidade sira bele hetan hotu bee.”
Entretantu komunidade nudar mos estudante, Jefita de Jesus Trindade Lay hateten bee sai hanesan nesesidade baziku ida ba komunidade sira iha vida moris lor-loron nian.
“Bainhira bee la sai, entaun sira nia atividade la la’o, lori saida mak ita haris ba eskola, ba servisu no ita hemu no tein lori saida, ne’ebe bee ne’e sai fator importante ba ita hotu,” nia hateten.
Tanba ne’e, nia parte husu ba governu liu husi DNAS tenke buka meius oinsa atu komunidade hotu bele asesu ba bee moos.
“Tenke kontrola diak ba area hirak ne’ebe komunidade sei halerik ba bee moos no tenke tau prioridade ba iha problema sira hanesan ne’e,” nia sujere.
