Xefe Estadu Major Jeneral Falintil-Forsa Defeza Timor-Leste (F-FDTL) Lere Anan Timor husu ba governu atu estabelese Tribunal Militar tanba nesesariu duni.
Nia dehan, forsa tenke iha tribunal ketak ida, tanba militar ida labele ba julga iha tribunal sivil nian.
“Kuandu nia sivil ona entaun bele julga iha tribunal sivil, kuandu nia militar, ne’e tenke tribunal militar mak antende,” Major Lere hateten, iha Dili.
Foin lalais husi parte Tribunal Munisipal Dili (TMD), nia dehan halo ona karta mandadu detensaun ba membru ida, maibe husi parte instituisaun (F-FDTL) la bele kumpri karta ne’e, tanba militar tenke detein iha polisia militar, la’os iha fatin seluk.
“Membru F-FDTL tenke detein iha polisia militar,” nia dehan.
Nia espera, governu liu husi Ministeru Defeza iha ona hanoin oinsa kria sistema ne’ebe adekuadu hodi estabelese tribunal militar hodi evita militar ida ba tuir fali julgamentu iha tribunal sivil.
Hatan ba kestaun ne’e Ministru Defeza Cirilio Cristovao, hateten governu iha ona hanoin atu estabelese duni tribunal militar ba forsa sira, maibe presiza prepara uluk kondisaun.
“Ita presiza rekursu humanu, ita nia rekursu humanus iha area ida ne’e agora iha jurist nain 13 ne’e sei iha inisiu,” Ministru Cristovao hateten.
Tanba ne’e, nia dehan iha tempu badak governu sei koordena ho Centru Formasaun Judisiariu, atu autoriza militar 13 hodi tuir formasaun iha area jurista nian.
“Forsa sira ne’ebe mak iha background jurista bele ba atu tuir formasaun iha area ida ne’e nian,” nia hateten.
Nia dehan, sekarik seidauk possible atu estabelese tribunal militar ida, entaun halo uluk panel ida, ne’ebe kompostu husi juis militar sira atu julga militar balun ne’ebe komete iha krimi. “Maibe ne’e sei planu,” nia hateten.
