Tuir lei national motorcycle helmet law ne’ebe Timor-Leste iha katak ema hotu ne’ebe sa’e motor inklui mos labarik sira tenke uja kapasete, nune’e bele prevene sira husi mate ga kanek bainhira akontese asidente trafiku ruma iha estrada.
Uja kapasete bele redus risku ba mate no kanek severe tantu ema bo’ot no labarik ki’ik sira no dalabark liu kanek iha ulun no kakorok mak kauza prinsipal ba mate, kanek todan no bele aleza.
Komandante Tranzitu Munisipiu Dili, Inspektor Matias da Silva, hateten durante ne’e motorista, liu-liu labarik ki’ik sira ne’ebe sa’e motor ho inan aman barak mak la uja helm no ida ne’e perigu ba sira nia vida.
“Iha lei ne’e la tau diferente entre ema bo’ot no labarik, lei dehan ema hotu ne’ebe sa’e motor tenke uja helm,” Komandante da Silva hateten, via telefone.
Tanba ne’e, nia husu ba inan aman sira bainhira sa’e motor ho oan tenke tau mos kapasete ba ba sira.
“Inan aman sira mak tenke iha konsiensia rasik katak iha helm mak foin bele sa’e motor,” nia sujere.
Nia hateten, iha ona motor bo’ot walu mak agora dadaun halo patrulha rutina iha estrada, no kuaze lor-loron kaptura ema sira ne’ebe la uja kapasete no uja motor kanu resin.
Enkuantu Membru Komisaun E (infra-estruturas, transporte no komunikasaun), Manuel de Castro Pereira hateten polisia tenke disiplina ezekuta orden.
“Polisia tenke tegas, forte no tenke tau lei iha oin,” nia hateten.
Alende ne’e, nia mos sujere ba governu atu fo formasaun kona ba kodigu estrada nian ba kondutores hotu inklui motorista, antes hetan karta kondusaun, tanba maske iha lei maibe ema la kompriende entaun sira nafatin kontra sinais tranzitu ne’ebe iha.
Entretantu komunidade Maria da Costa hateten, tau helm ba oan sira bainhra sa’e motor ho inan aman ne’e importante, nune’e bele fo protesaun ba oan karik akontese asidente.
“Ita tenke proteje mos ita nia oan nia vida, entaun tenke tau helm mos ba nia,” nia sujere.
Enkuantu maske laiha dadus espesifiku ida kona ba ema hira mak mate no kanek kauza husi la uja kapasete, maibe tuir dadus jeral husi Polisia Nasional Timor-Leste (PNTL) husi 13 munisipius katak total asidente trafiku ne’ebe akontese durante tinan 2015, hamutuk 1664, nain 89 mate, 417 kanek todan no 1158 kanek kma’an.
