Jogus Ilegal kontinua eziste iha rai laran tanba falta kontrolu husi Polisia Nasional Timor-Leste (PNTL).
Membru Parlamentu (MP) Agostinho Lay,nia hateten, iha lei hatuur klarumente bandu jogu illegal sira hanesan bola guling, casino, SDSB inklui game uza osan atu labele eziste iha rai laran, maibe realidade jogu hirak ne’e kontinua espalha.
“Polisa sira halo duni operasaun, maibe sira la konsege kombate nia rede, lolos polisia tenke buka mak nia hun ne’e,” Deputadu Lay kestiona, iha Parlamentu Nasional.
Tanba tuir nia, jogu illegal bele estraga estabilidade no estadu la hetan vantagen tanba sira (nain ba jogu illegal) la selu impostu.
Nia deskonfia, katak iha ema bo’ot balun mak sai broker ba rede jogu illegal sira ne’e, polisia labele tauk, tenke implementa lei no orden.
“Broker ne’e, atu nia ema bo’ot ga ema ki’ik, tenke hasai tiha sira nia rede ne’ebe metin, dala ruma polisia foin mak atu halo operasaun rede ne’e hatene uluk ona,” nia preokupa.
Hatan ba kestaun ne’e Vise Komandante Jeral Polisia Nasional Timor-Leste (PNTL), Komisariu Faustino da Costa, hateten Polisia kaptura ona ema lubuk ida ne’ebe mak hala’o jogu illegal iha Timor durante ne’e.
“Polisia halo kapturasaun no foti sasan sira ne’e, agora prosesa hela no hein deit halo julgamentu iha tribunal,” Komisariu Costa informa.
Tanba iha diploma ministerial, nia dehan mensiona klaru ona katak PNTL bele hamutuk ho Diresaun Jeral Jogus nian iha Ministeriu Komersiu, Industria no Ambiente (MCIA) hodi hapara aktividades ne’ebe mak latuir lei.
Maibe lei ne’e mos, nia dehan dala ruma iha nia implementasaun mosu difikuldade, tanba kompetensia masimu ba kontrolu jogus sira ne’e governu.
“Jogus illegal barak iha ne’eba mak polisia la atua,” nia dehan.
