Komite 12 Novembru entrega ona dezenho monumentu Masakre Santa Cruz ba iha governu atu hahu nia konstrusaun.
Prezidente Komite 12 Novembru, Gregorio Saldanha hateten ne’e obra bo’ot ida, tanba dezenho ne’e iha faze rua mak governu tenke hadia hanesan rate sira iha laran no kapela antes halo monumentu iha odamatan Santa Cruz.
“Finaliza no aprova ona, ohin ami tenke entrega ba iha governu liu husi ADN (Agensia Dezenvolvimentu Nasional) nia hateten, iha Dili.
Tuir planu, obra ba iha konstrusaun sei lansa iha komemorasaun Masakre 12 Novembru tinan ne’e.
Alende ne’e, nia dehan komite mos koalia ona ho governu atu halo mos statua asuwain Sebastião Gomes nian hodi tau iha Igreja Motael oin.
Sebastião Gomes, mak hanesan autor ba iha demonstrasaun hasoru Indonesia ne’ebe forsa Indonesia tiru mate iha Motael, iha fulan Outubru 1991. Studante rihun mak military Indonesia oho iha dia 12 de Novembru, 1991 bainhira sira visita asuwain Sebastião Gomes nia rate iha Santa Cruz.
Hatan ba kestaun ne’e Sekretario Estado Joventude no Desportu (SEJD), Leovigildo da Costa Hornai hateten governu nafatin esforsu atu iha monumentu ida ba matebian Sebastião Gomes no sei tau duni iha Igreja Motael nia oin, fatin ne’ebe forsa Indonesia oho nia ba.
Iha parte seluk Membru Parlamentu, Josefa Alvares Soares hateten parlamentu aprova orsamentu ba planu ida ne’e kleur ona, maibe ate agora seidauk harii.
“Sira presiza halo estudu viabilidade ida didiak mak foin bele halo,” nia hateten.
