Deskonfia oknum polisia baku komunidade iha suku Bairo-Pite, Aldeia Rai Nain, Munisipiu Dili, enkuantu Membru Parlamentu lamentavel ho attitude ida ne’e no husu atu halo investigasaun.
Membru Parlamentu (MP) Francisco da Costa, hateten Polisia nudar servidor nasaun no fo seguransa ba nia sidadaun, la,os halo fali krime hasoru komunidade.
Nia konta, iha oras tuku rua madrugada oknum polisia ne’e ho nia kolega sira ba halo attakes iha vitima nia uma hodi baku no rasta maizumenus metrus 100 ba estrada hodi kontinu baku.
“Ne’e attitude ne’ebe ladiak, tenke halo investigasaun ne’ebe mais professional,” nia sujere, iha Parlamentu Nasional.
Nia informa, ho hahalok ida ne’e halo komunidades iha fatin ne’e sente trauma, tanba iha momentu akontesementu, oknum polisia ne’e konsege hasai kilat hodi ameasa komunidade iha fatin ne’eba.
Iha lei internu PNTL nian artigu 4 hatuur klarumente katak, tuku 5:30 lokraik membru polisia hotu-hotu tenke hatama ona kilat iha armajen, maibe nia dehan realidade iha terenu implementasaun lei ne’e la funsiona.
Hatan ba kestaun ne’e Komandante do Administrasaun, Superintendente Mateus Fernandes, hateten komunidade bele keixa bainhira sira sai vitima ba hahalok oknum PNTL.
“Mai hato’o keixa hodi nune’e ita bele hatene see mak sala,” nia hateten.
Se iha rezultadu investigasaun hatudu katak oknum ne’e mak sala, entaun nia dehan husi komando sei fo sansaun ba membru ne’e.
