Deskonfia oknum Polisia husi Bataliaun Ordem Publika (BOP) husi postu administrativa Maliana, munisipiu Bobonaro baku membru Falintil-Forsa Defeza Timor-leste (F-FDTL) wainhira halo’o hela knar iha baze.
Komandante Jeral Polisia Nasional Timor-Leste (PNTL), Komisariu Julio da Costa Hornai, hateten husi komando estabelese ona ekipa konjunta ida atu halo prosesu investigasaun ba kazu ne’e.
“Komando sei hein rezultadu prosesu investigasaun antes foti desizaun,” nia dehan.
Nia informa, wainhira kazu ne’e akontese nia parte simu kedas informasaun husi terenu no informa kedas ba iha Major Jeneral F-FDTL.
“Ami informa malu hodi oinsa bele buka solusaun ba problema ne’e, tanba ne’e ami deside loke prosesu investigasaun,” Komisariu Hornai hateten.
Antes nee, Xefe Estadu Major Jeneral Lere Anan Timor husu ona ba komando PNTL atu fo demisaun ba membrus ne’ebe hafoer instituisaun ni naran liu husi attitude krime hanesan ne’e.
“Diak liu hasai tiha membru ne’ebe mak hakarak estraga instituisaun rua nia naran ne’e,” Xefe Estadu Maior Jeneral Lere hateten.
Tanba tuir nia, sira (instituisaun rua ne’e) mak hanesan lutu ba nasaun, entaun tenke hatudu atitude ne’ebe diak ba publiku.
Nia nafatin husu ba komando PNTL atu foti medidas ne’ebe mais forte ba membru ne’e, tanba attitude krime husi membru PNTL hasoru membru forsa sira dala barak ona akontese.
Nia deskonfia, iha PNTL nia laran mosu grupos organizadu balun ne’ebe hakarak provoka situasaun hodi sobu instituisaun rua nee, tanba ne’e husu ba komandu PNTL tenke investiga no buka tuir ema sira nee.
Kazu ne’e rasik, akontese iha loron kinta (18/08/2016) iha postu administrativu Maliana, munisipiu Bobonaro.
