Governu hamutuk ho agensia internasional no organizasuan local ne’ebe servisu ba area protesaun ba labarik diskute hela planu asaun nasional ba kombate trabalho infantile iha Timor –Leste.
Planu Asaun Nasional (PAN) hanesan matadalan ba governu no parseirus hotu hodi la’o tuir durante tinan lima (2016-2020) hodi implementa programa kombate servisu forsado infantil iha Timor –Leste.
Sekretario Estado Politika Formasaun Profesional e Empregu (SEPFOPE), Ilidio Ximenes da Costa, hateten trabalho infantil ne’e problema komplikadu ne’ebe presiza ema hotu nia kontribuisaun.
Iha Konstituisaun RDTL garantia ona protesaun ba labarik no governu ratifika ona konvensaun internasional trabalho infantil, maibe durante ne’e seidauk iha planu asaun ida atu kombate problema ne’e.
“Importante tebes hamosu planu ida ne’ebe diak no akomoda realidade Timor –Leste nian,”nia hateten iha wokshop nasional kombate trabalho infantil iha salaun Timor Plaza, Dili.
“No planu ne’e tenke bazeia ba planu dezenvolvementu nasional ne’ebe iha ona.” Nia hateten, problema trabalho infantile iha mos ligasaun ho kultura Timor nian ne’ebe sei eziste, hanesan fahe servisu ba malu tantu iha setor agrikultura, domestiku, entaun presiza haree no konsidera mos tradisaun.
Nia hateten, governu sei propoin orsamentu ba programa edukasaun ba komunidade sira atu lalika haruka labarik sira servisu, labarik sira tenke estuda no halimar.
Alende ne’e, nia dehan governu mos sei prepara rekursu humanu atu halo monitorizasaun no avaliasaun ba programas ne’ebe implementa husi agensia internasional, orgnaizasaun local no instituisaun seluk.
Iha parte seluk reprezentante Konfederasaun Sindikatu Timor –Leste (KSTL), Jose da Conceicão da Costa, apresia esforsu governu nian hamosu PAN kombate trabalho infantile no sira prontu atu servisu hamutuk iha implementasaun.
“Ita tenke aselera lalais ona prosesu sira ne’e, tanba labarik barak mak iha ne’eba ona (servisu),” nia hateten.
Nia dehan, iha tinan rua liu ba KSTL halo ona kampanha nasional kona ba trabalho infantil iha komunidade liu –liu husu familia atu labele haruka labarik halo servisu ne’ebe todan.
Entretantu Prezidente Komisaun Nasional Kombate Trabalho Infantil (KNTI), Aniceto Leto Soro, hateten munisipio hotu sei sai alvu ba implementasaun programa tanba trabalho infantil eziste iha munisipio hotu.
“Atu ita bele elimina numeru trabalho infantil,” nia hateten.
KNTI hanesan komisaun nasional ida ne’ebe estabelese husi governu iha tinan 2014, ho nia funsaun atu koordena servisus no implementa programa governu nian hodi kombate trabalho infantil.
Komisaun ida lidera husi Sekretario Estado Politika Formasaun Profesional e Empregu, ne’ebe nia membru sira mai husi reprezentante sosiedade sivil, sindikatu trabalhador, empregador no ministerios inklui sekretario estado relevantes sira.
Antes ne’e, nia dehan KNTI halo ona kampanha lubuk ida iha munisipio balun hodi hasa’e konsiensia familia (inan aman) atu labele haruka oan sira servisu tanba sira nia tempu atu eskola no halimar.
