Programa Biblioteka Haleu ne’ebe durante ne’e implementa iha rai laran liu husi Fundasaun Alola, ho objetivu atu hakiak kultura lee ba labarik sira.
Jerente Programa Edukasaun Fundasaun Alola (FA), Emma de Sousa, hateten programa ida ne’e hetan apresiasaun bo’ot husi komunidade no labarik sira, tanba fasilita ona labarik sira asesu ba livrus.
“Labarik sira kontente los lee livru sira, tanba ne’e bainhira ami fila, sira hameno atu visita tan sira nia eskola,” nia hateten, iha nia knar fatin Mascarenhas, Dili.
Programa biblioteka haleu ne’e rasik, nia hateten lansa iha tinan 2012, ho objetivu hatudu ba komunidades no ema hotu katak lee ne’e importante atu dezenvolve sira nia hanoin no konesementu ba siensia.
Nia hatutan, importante mos hatudu ba profesores sira kona ba importansia husi lee tanba livru barak iha eskola rai deit iha armari laran, la fahe ba estudante sira hodi lee.
Livrus ne’ebe uza iha programa ne’e, nia hateten produs hosi Fundasaun Alola ho lingua ne’ebe simples atu labarik sira bele komprende no iha mos pinturas ne’ebe bele atrai labarik sira atu lee.
Tuir dadus ne’ebe iha, nia hateten labarik kuaze nain 14.196 husi munisipio Ermera, Lautem, Manufahi, Viqueque, Oecusse no Dili mak sai ona benefisiario husi programa ne’e.
Iha tinan 2016 ne’e, nia hateten Alola servisu hamutuk ho agensia Internasional Childfund implementa mos programa ne’e iha munisipio Bobonaro no Liquisa.
Programa biblioteka haleu dezenvolve iha tinan 2012 no hetan apoia husi Department of Foreign Affairs and Trade (Australia) atu hakiak kultura lee ba labarik sira iha Timor tanba maioria Timor oan baruk lee livru.
Entretantu fundador ba biblioteka publiku Xanana Reading Room, Kristy Sword Gusmão, hateten lee livru ne’e buat foun ba Timor, entaun presiza enkoraja no hatudu ba labarik sira katak lee ne’e importante hodi aumenta sira nia konesementu iha siensia.
“Hau loke sala leitura Xanana Gusmão no biblioteka publiku ki’ik ida atu oferese fatin ba joven sira hodi estuda no hakiak kultura lee ne’ebe hanesan buat foun ba Timor,” nia hateten.
Nia mos kongratula Fundasaun Alola nian ne’ebe fasilita ona labarik sira iha area rural asesu ba livrus liu husi programa biblioteka haleu, tanba susar ba labarik sira atu asesu ba livru iha area remotas.
“Hau espera iha future la presiza ona biblioteka haleu tanba iha komunidade no eskolas iha ona biblioteka rasik,” nia esperansa.
