Banku Nasional de Sangue (BNS) enkoraja familia pasiente sira atu fo ran bainhira presiza urgente liu –liu grupo ran A no AB, tanba grupo ran rua ne’e sempre falta.
Xefe Unidade Banku Nasional de Sangue, Arsenio Jose Afonso, hateten grupos ran A no AB susar tebes atu hetan iha Timor –Leste, tanba ne’e kuandu presiza urgente ruma, familia pasiente tenke apoia.
“Stok grupo ran A no AB menus liu, tanba ne’e dala ruma pasiente presiza entau, ami enkoraja familia sira atu fo ran,” nia hateten, iha nia knar fatin Bidau, Dili.
Nia dehan, sira iha grupo doadores voluntario maibe barak liu mak ho grupo ran O, sira ne’ebe ho grupo ran A no AB numeru ki’ik tebes, entaun iha situasaun ruma sira labele fo ran, familia pasiente iha obrigasaun atu fo ran.
Kada loron, nia dehan sira distribui ran pakote 25 to’o 30 hodi salva pasientes iha sala maternidade, operasaun no internamentu ospital nasional, uma maternidade sentru saude sira, ospital referral inklui mos klinika privadu sira.
Alende ne’e, nia preokupa tebes ho pozisaun governu liu husi Ministeriu Saude kona ba kestaun ne’e, tanba la kria kondisaun ne’ebe diak (fatin, rekursu humanus, transportes no fasilidade seluk) atu apoia servisu BSN nian hodi salva ema nia vida, liu –liu inan sira.
Nia hateten, durante ne’e inan feto barak mak mate, tanba instabilidade stok ran iha ospital referral sira no ospital nasional.
“Iha kazu ida ; iha fulan tolu liu ba pasiente inan feto ida husi postu administrative Same, Manufahi hetan abortu no halo referral mai Ospital Referral Maubesi laiha pakote grupo ran AB, entaun evakua tiha mai ospital nasional, maibe labele salva paisente ne’e nia vida, tanba ran fakar barak iha dalan,” nia hateten.
Nia dehan, problema ne’ebe sira hasoru maka fatin ne’ebe la apropriadu (klo’ot), falta transportes no menus rekursu humanus e entaun difikulta tebes atu halo doasaun movel iha instituisaun sira.
Entertantu komunidade Manuel da Silva, hateten familia iha obrigasaun atu salva membru familia ida nia moris, tanba laiha solusaun seluk bainhira stok ran iha banku laiha.
“Familia iha responsabilidade bo’ot atu salva nia membru familia ida nia moris liu husi fo ran, ita labele obriga pesoal saude sira atu buka ran,” nia dehan.
Nia mos, husu ba ema hotu atu fo sira nia ran regular ba iha BNS, labele hein familia presiza foin hasai ran, tanba ema liu –liu inan feto sira barak mak presiza ran hodi salva sira nia moris.
Tuir dadus husi Organizasaun Saude Mundial (OSM) hatudu iha rejiaun Sudeste Aziatiku kada tinan koleta pakote ran hamutuk miliaun 15, 9. Husi ran ne’ebe iha, 82% koleta husi doador voluntario sira.
Enkuantu Diretor Regional OSM rejiaun sudeste Asiatiku, Dr. Poonam Kherapal Singh iha nia mensajen iha loron mundial doasaun ran tinan ne’e (2016), husu atu involve no enkoraja komunidade sira ho regularmente no voluntariomente fo sira nia ran.
Ran hanesan produtu ne’ebe bele salva pasiente nia vida, maibe nia dehan, liu husi transfusaun ran mos bele sai fonte ba iha transmisaun moras.
“Hamutuk ita luta hodi atinji ita nia meta asegura asesu universal ba ran seguru no produsaun ran,” nia hateten.
