Polisia Sientifika Investigasaun ba Kriminal (PSIK) hahu loke prosesu investigasaun ba kazu kontainer hat ne’ebe nakonu ho tua manas (miras) iha Portu Dili.
Xefe Investigasaun Polisia Sientifika Investigasaun ba Kriminal (PSIK), Adino Nunes Cabral, hateten PSIK ezekuta orden ne’ebe mai husi Tribunal Munisipal Dili (TMD), hodi prende tiha kontainer hat ne’e.
“Tanba deskonfia sasan sira ne’e prezuidu ba krimi iha rai laran no agora prosesu investigasaun lao hela,” Xefe Cabral hateten, iha Dili.
Tua hirak ne’e mai husi nasaun Singapura, no kona ba tama mai Timor ho legal ou la’e, nia dehan, rezultadu investigasaun mak sei determina.
“Rezultadu investigasaun ami sei entrega ba Ministeriu Publiku,” nia dehan.
Nia konta, kontainer hat ne’e tama mai Timor iha loron Segunda-feira, dia 23 Abril 2016, no iha altura ne’eba tribunal hatun kedas mandatu detensaun ba PSIK hodi prende sasan hirak ne’e.
Iha fatin seluk Membru Parlamentu, Deputadu Cesar Valente, konkorda atu halo prosesu investigasaun ba kontainer hat ne’e.
“Karik sira viola regras ruma, no lolos tua ho montante barak labele tama mai hanesan ne’e,” nia hateten.
Tanba ne’e, nia husu, ba PSIK atu halo prosesu investigasaun ne’ebe rigorozu, nune’e hatene lolos objetivu tua hirak ne’e tama mai Timor no atu distribui ba ne’ebe?.
Iha parte seluk estudante Universidade da Paz (UNPAZ), Manuel Barros, hateten Timor bele importa tua (labele barak liu) husi nasaun liur, maibe tenke haree didiak nia legalidade no objetivu.
“Governu tenke haree didiak kestaun ne’e,” nia dehan.
