Diretor Organizasaun Foinsae Unidade Dezenvolvementu Future (FUNDEF), Carlos Moniz Gonsalves, hateten FUNDEF hetan apoia finanseira orsamentu hamutuk $ 90,894 husi governu Japaun hodi konstrui salas de aula balun iha Eskola Baziku Filial (EBF) iha suku Cribas iha munisipiu Manatuto.
Nia hateten, osan hirak ne’e sei uza hodi konstrui salas tolu no haris fatin lima, tanba iha eskola refere salas sei menus inklui haris fatin, enkuantu kuantidade alunus barak liu.
“Konstrui tan salas balun no haris fatin ba alunus sira, ne’e importante tebes ba sira,” Diretor FUNDEF Gonsalves hateten, hafoin asina akordu ho embaixada Japaun, iha Marconi. Dili.
Nia dehan, projetu ne’e sei implementa iha 25 Marsu 2016 no sei jere rasik husi FUNDEF, no espera sei remata ho tempu ne’ebe determina ona.
Iha parte seluk Diretor Geral Servicos Corporativos Ministeriu Edukasaun, Antoninho Pires, hateten kuaze 800 resin eskolas iha Timor laran tomak iha kondisaun ne’ebe la favoravel e agradese tanba FUNDEF prontu atu ajuda governu hodi konstrui salas balun iha eskola Cribas.
“Agradese ba FUNDEF ne’ebe mos kontribui iha edukasaun, ajuda ona ministeiru educasaun atu minimiza problema balun kona ba edukasaun nian iha areas infraestruturas baziku,” nia agradese.
Alende ne’e, nia mos agredese ba embaixada Japaun ne’ebe apoia ona FUNDEF hodi halo konstrusaun ba salas eskola bazika filhal Cribas nian.
Iha parte seluk estudante Graciela Ximenes, hateten kuaze eskola iha Timor maioria ho kondisaun aat no lolos kada tinan governu tenke aloka osan hodi hadia.
“Sira tenke iha planu proprio kada tinan to’o tinan lima focus ba hadia eskola, depois mak halo fali buat seluk,” nia sujere.
