Prezidente Komisaun Anti Korupsaun (KAK), Komisariu Aderito Tilman, hateten durante tinan 2015 KAK konsege halo investigasaun ba kazu korupsaun ne’ebe involve funsionariu publiku sira inklui lideransa balun hamutuk 10.
Nia hateten, durante tinan neen (6) KAK ejiste konsege investiga ona funsionariu lubuk ida ne’ebe involve iha kazu korupsaun no balun tama ona iha prizaun, no iha tinan 2015 ne’e mak hamutuk 10.
“Iha 2015 kazu pendente iha KAK no prosesu investigasuan la’o hela mak hamutuk 10,” Komisariu Tilman hateten, iha Dili.
Maibe, nia dehan, iha prosesu investigasaun, KAK hasoru difikuldade lubuk ida tanba to’o agora seidauk iha lei anti korupsaun no implementasaun lei protesaun ba sasin sei fraku, entaun halo testamunha sente ladun seguru hodi aprezenta provas.
“Sira hatene mosu korupsaun iha sira nia servisu fatin, maibe labele fo sai tanba tauk,” nia dehan.
Tanba ne’e, nia dehan, defisil oituan ba KAK atu investiga kazu ida ho lais, tanba akumulasaun faktus no provas ba aktu korupsaun ne’e KAK buka rasik.
Iha parte seluk Deputada Albina Marcal, apresia ho servisu KAK nian ne’ebe konsege halo prosesu investigasaun hasoru lider no funsionariu sira ne’ebe involve iha aktu korupsaun.
“Ita apresia no espera ba oin sira bele servisu diak liu tan,” nia esperansa.
Tuir nia, aktu korupsaun nudar attitude ne’ebe ladiak no halo terus povu sira ne’ebe lolos tenke goza sira nia moris, maibe tanba korupsaun akontese iha nivel leten, entaun povu defisil atu hetan nia direitu ba moris diak.
Tanba ne’e, nia husu ba entidades hotu ne’ebe karik hatene no kaer toman ema halo aktus sira hanesan ne’e tenke barani atu kolabora ho KAK hodi bele kombate attitude hanesan ne’e.
Iha parte seluk Marcia da Costa, hateten korupsaun nudar hahalok ne’ebe ladiak, no nia impaktu ba povu ki’ik sira ne’ebe kbi’it la’e sira kontinua moris iha terus no susar nia laran.
“Ita haree povu ki’ik sira kontinua moris iha situasaun ne’ebe kiak no terus, tanba korupsaun buras iha rai laran,” nia dehan.
