Diretora Saude Munisipio Dili, Agustina da Costa Saldanha, hateten maske roo ambulansia paradu maibe la fo impaktu ba iha prosesu transferensia pasiente husi postu administrative Atauro mai iha Ospital Nasional Guido Valadares (HNGV).
Nia dehan, Ministerio Saude halo ona kontratu ho aviaun helikoptru rua hodi halo evakuasaun ba iha pasientes ne’ebe iha situasaun emergensia.
“Transferensia pasiente Atauro mai Dili, ita laiha problema, tanba ita iha hela aviaun ne’ebe halo evakuasaun ba kazu sira ne’ebe emergensia loos hanesan ran fakar,” Diretora Saldanha hateten, iha nia knaar fatin Bairo Formosa, Dili.
Kona ba kazu sira ne’ebe ladun emergensia hanesan presiza halo diagnostika no hasoru malu ho espesialistas, nia dehan, pasiente sira bele transfere ho roo Nakroma no bero oan.
Iha parte seluk, membru Komisaun F (saude, edukasaun, kultura, veteranus e igualdade jeneru), Deputadu Eladio Faculto, hateten ministerio nia responsabilidade atu garantia prosesu evakausaun ba pasiente emergensia sira.
“Transferensia moras laiha problema ona tanba ministerio kontratu aviaun helikoptru hodi halo evakuasaun ba kazu emergensia,” nia hateten.
Maske nune’e, nia ejiji, tenke halo investigasaun ida klean kona ba prosesu sosa roo ambulansia ne’ebe aat durante tinan rua ona.
