Tribunal Munisipal Dili (TMD) halo julgamentu ba kazu ofensas ba integridade fisica simples ne’ebe involve arguido CN ne’ebe baku SF (maun nia ferik oan) to’o desmaia.
Bazea ba akuzasaun Ministeriu Publiku ne’ebe lee sai husi juis prezidente, katak iha oras tuku lima lokraik arguido nia ferik oan foti sanan hodi da’an koto, nudar bin, lezada hateten ba arguido nia fen hodi kose sanan ne’e didiak wainhira tein hotu, tanba dala ruma arguido nia fen uza sanan no tasu sira iha dapur nunka iha hanoin atu fase.
Tanba ne’e iha altura ne’eba, lezada hanesan fo hanoin deit ba arguido nia fen, maibe tanba arguido nia fen la simu ho liafuan ida ne’e, entaun arguido nia fen tama ba kuartu laran hodi informa ba arguido kona ba saida mak akontese.
Wainhira arguido sai husi kuartu laran ba kedas dapur hodi fakar tiha koto ne’ebe mak iha sanan laran no tebe sasan iha dapur laran, hafoin ida ne’e lezada hakilar ba arguido hodi dehan “tanba sa mak halo hanesan ne’e,” laiha lian arguido hakat ba lezada hodi basa no tebe lezada.
Tanba sente attitude ida ne’e hanesan krimi ida, entaun lezada lori kazu ne’e ba polisia hosi prosesu tuir sistema justisa formal.
Hafoin lee sai akuzasaun hirak ne’e, juis prezidente husu ba arguido hili atu koalia ou nonok, maibe arguido hili kolia hodi dehan ba tribunal, katak durante arguido no nia fen hela hamutuk ho lezada no nia maun, lezada sempre hatudu hahalok ne’ebe la diak ba arguido no nia fen, wainhira arguido baku lezada ne’e tanba sente la aguenta ona.
“Sanan sira ne’e dala ruma hau nia ferik oan fase no kose ona, maibe dehan la mos ne’ebe nia tenke fase fali, depois hahan kuandu nia han mos han nonok deit no hatudu jeitu oin-oin deit,” arguido CN deklara iha TMD.
Durante tinan rua hahalok oin-oin deit mak lezada hatudu, maibe arguido tahan deit maibe iha altura ne’eba arguidu sente labele ona, entaun arguido ho nervozu baku lezada.
Maibe, arguido arepende ho hahalok ne’ebe mak nia halo ba lezada, entaun nia husu deskulpa ba lezada mesmu fofoun la simu, maibe komu arguido tenta hela deit, ikus mai lezada fo perdua ba nia.
Hafoin rona tiha deklarasaun husi arguido, juis prezidente husu ba lezada atu hili koalia ou nonok maibe lezada hili nonok. Entaun ikus mai juis prezident fo pena prizaun tinan rua, suspende ba tinan ida ba arguido, wainhira arguido halo tan hahalok ne’e, mak direitamente tama prizaun.
