Membru Parlamentu Nasional, Deputadu Osorio Florindo, hateten bailoro naruk ne’ebe akontese iha tinan ida ne’e halo karau barak mak mate iha munisipiu Lautem (parte norte nian).
Tanba ne’e, nia husu ba governu tenke haree ba situasaun ida ne’e, tanba karau importante tebes ba komunidade sira.
“Kuaze karau tolu nulu mak mate tanba bee laiha, no karau hirak ne’ebe sei moris mos ho kondisaun krekas no ruin deit, presiza tau matan,” Deputadu Florindo kestiona iha Parlamentu Nasional.
Pelumenus, tuir nia, governu presiza halo ona levantamentu ruma iha fatin ne’ebe akontese situasaun ida ne’e hodi trasa planu de atendementu.
“Tanba mesmu udan iha fatin balun, maibe fatin ne’ebe ami refere hanesan tasi ibun tama to’o Tutuala udan laiha,” nia hateten.
Alende ne’e, nia dehan, batar ne’ebe mak komunidade kuda mos maran hotu ona inklui bee moos laiha.
Hatan ba kestaun ne’e, Ministru Agrikultura e Pescas (MAP), Estanislau da Silva, katak governu iha ona planu atu hatan ba situasaun hirak ne’e, maibe komunidade presiza organiza sira nia karau iha fatin ida, nune’e komisaun bele oferese bee ba sira nia karau.
“Tenke organiza sira nia karau iha fatin ida deit, fatin ne’ebe kareta bele asesu ba, nune’e bele tau bee iha ne’eba para karau sira ne’e ba hemu,” Ministru da Silva hateten.
