Xefe Unidade Pagamento dos Bolseiros Fundu Dezenvolvimentu Capital Humanu (FDCH), Domingos Fernandes, hateten tinan ida ne’e sistema pagamentu kustu da vida ba bolseirus sei liu husi adidu da edukasaun (la direita ba konta bankaria bolseirus nian).
Nia dehan, sistema pagamentu propinas direita ba konta bankaria universidade nian, maibe kona ba vida moris liu husi adidu edukasaun, atu adidu bele kontrola mos, tanba antes iha problema kontrolu no despezas.
“Ita bele justifika bolseirus sira ne’e eziste duni, tanba se ita la halo hanesan ne’e, ita lahatene bolseirus sira ne’e ba eskola ga la’e,” Fernandes hateten, bainhira halo enkontru ho ministerio sira, iha salaun Ministerio Solidaridade Sosial, Kaikoli Dili.
Nia hatutan, kriteria ne’ebe presiza haree bainhira halo pagamentu, mak hanesan pedidu pagamentu husi ministerio kompletu ho lista benefisiariu, kontratu bolseirus ho valor no kontratu ministerio ho universidade atu garantia estudantes ne’e eziste duni.
“Husu ministerio sira atu koordena hamutuk, liu –liu prosesu pagamentu,” nia sujere.
Nia informa, prosesu pagamentu kustu da vida no propinas ne’ebe sira hala’o kada trimester (fulan neen), tanba ne’e bolseiru sira tenke ezekuta ho disiplina atu labele fo impaktu ba sira nia estudu.
Nia hateten, kustu vida lor-loron kada estudantes la hanesan, balun fulan ida $200 no 300 hodi selu uma, hahan no seluk tan.
Iha parte seluk, Prezidente Komisaun F (saude, edukasaun, kultura, veteranus no igualdade jeneru), Deputadu Virgilio da Costa Hornai, konkorda ho sistema foun ida ne’e atu adidu sira mos bele kontrolu.
“Sistema ne’e fasilita diak liu tan prosesu pagamentu, tanba transferensia direita mos iha problema, la to’o fulan osan hotu ona,” nia hateten.
Nia mos, husu atu adidu sira atu akompanha no kontrolu bolseiru sira nia prestasaun, disiplina no dezempenho, nune’e fila kontribui duni ba nasaun.
