Fundador Lalenok ba Ema Hotu (LABEH), Christopher Henry Samson, hateten Sentru formasaun LABEH komesa fo kapasitasaun lian Inglesh ba labarik idade (4-6) sira.
Nia dehan, formasaun sedu ba labarik sira ne’e importante tebes, tanba fasil ba sira bainhira tama ensino baziku no sekundario.
“Ita haree dadaun estudantes sira dala barak susar ba sira atu koalia lian Ingles baziku maske sira remata ona ensino sekundario,” Samson hateten, iha serimonia despedida ho estudantes ne’ebe remata ona sira nia kursu, iha salaun LABEH, Comoro, Dili.
Kona ba estudante barak susar koalia lian Ingles, tanba tuir nia, Timor –Leste seidauk iha profesores ne’ebe kapasitadu atu hanorin Ingles iha ensino.
Nia mos agradese, tanba ministerio edukasaun hatama ona lian Inglesh iha kurikulum nasional hodi uja hanorin iha ensino (maske la’os materia prinsipal).
Entretantu Prezidente Komisaun F (saude, edukasaun, kultura, veteranus e igualdade jeneru), Deputadu Virgilio da Costa Hornai, hateten iha era globalizasaun ne’e konesementu ba lian ne’e importante tebes.
“Konesementu lian barak liu ne’e fasilita tebes ema nia asesibilidade ba iha komunikasaun pesoal no servisus,” Hornai hateten.
Nia mos rekonese, katak Timor –Leste sei hasoru problema menus profesores disiplina lian Inglesh.
“Ministerio reforma profesores, iha rekrutamentu foun tenke haree profesores ne’ebe iha disiplina espesializada atu hanorin ho diak,” nia sujere.
