Xefe Departamentu Moras La hadaet Ministerio Saude (MS), doutor Herculano Seixas do Santos, hateten tinan ida ne’e (2016) ministerio estabelese klinika ida hodi fo atendementu ba iha konsumidores sigaru (ativu) sira ne’ebe hakarak hapara sigaru.
Nia dehan, klinika ne’e ho objetivu atu halo promosaun kona ba impaktu sigaru ba saude publiku no fo aimoruk ba fumador sira ne’ebe hakarak hapara sigaru (nei-neik).
“Ami estabelese klinika hapara fuma nian, bele fo aimoruk (nicotine refreshment therapy) ba fumador sira, ajuda sira hapara sigaru,” doutor Seixas hateten, iha Sentru Juvenil Taibesi, Dili.
Nia hateten, fumador ne’ebe susar atu hapara sigaru iha tempu ne’ebe badak (tanba nicotine domina ona iha sira nia ran), presiza akompanhamentu ho aimoruk atu para fuma nian.
Kona ba sira (fumador) ne’ebe ho konsiensia no komitmentu rasik hapara fuma, nia fo apresiasaun, tanba produtu sigaru ne’e gasta osan no lori moras ba ema nia saude.
Iha parte seluk, Deputadu Antonio Ximenes Serpa, ne’ebe antes ne’e fuma (fumador) no agora husik ona (tinan rua ona), rekonese katak susar atu hapara ho instant, maibe presiza tempu no apoia husi familia.
“Hau uluk ne’e fumador, kuaze loron ida hau fuma sigaru LA masu neen, maibe bainhira hau hetan moras, doutor sira sujere tenke hapara ona sigaru, entaun hau hapara fuma tanba hau hakarak moris,” Deputadu Serpa hateten.
Tanba ne’e, nia konkorda, atu MS estabelese klinika hapara sigaru nian, akompanha no apoia fumador sira ne’ebe iha hanoin atu para fuma sigaru.
Nia hatutan, edukasaun saude importante tebes ba komunidades, liu-liu kona ba impaktu sigaru ba saude, presiza habelar informasaun ba iha komunidades iha area remotas.
Tuir dadus estimasaun organizasaun Saude Mundial (OMS), katak 521/100.000 iha posibilidade hetan moras kankru, tanba numeru konsumu sigaru no alcohol aas iha Timor –Leste.
