Ministru Agrikultura e Pescas (MAP), Estanislau da Silva, hateten tinan ida ne’e (2016) MAP hapara hakiak ikan lele no kontinua hakiak ikan tilapia, tanba ikan lele ladun fo benefisiu.
Nia hateten, hakiak ikan lele nia gastus bo’ot, tanba presiza oksigen no fo hahan ne’ebe mak espesial.
“Ami hakiak ikan tilapia ‘ikan nila’ tanba nila ne’e nia ejizensia ne’e ladun bo’ot hanesan ikan lele,” Ministru Silva hateten, iha Dili.
Nia hatutan, governu sei importa ikan tilapia husi nasaun Indonezia no fahe ba grupu kooperativa no individual sira ne’ebe hakarak atu hakiak.
“Ikan tilapia ne’e melhorada, ikan ne’ebe nia bo’ot lalais no nia adapta ba kondisoens ambiental rai ne’e nian, tanba ne’e ami sei importa rihun ba rihun,” nia hateten.
Enkuantu Membru Parlamentu (MP) Nasional, Deputadu Paulino Monteiro Soares Babo, konkorda ho programa ida ne’e, maibe tenke garantia nia kontinuasaun no kontrolu, atu nune’e atividades ne’e bele la’o ho susesu.
“Tenke kontrolu no jestaun ne’e tenke halo diak liu tan,” Deputadu Babo hateten.
Nia mos, sujere ba governu atu prepara materiais modernu no rekursu humanus ne’ebe mak kapasitadu atu hakiak ikan tilapia ne’e.
Tuir nia, iha Timor produsaun ikan sei minimu tebes, tanba ne’e fo impaktu ba folin ikan kada loron sempre sa’e.
“Entaun folin karun, sekuandu barak entaun folin sei tuun,” nia hateten.
Nia espera, ho programa ida ne’e bele kontribui hasa’e produsaun ikan iha rai laran.
Iha parte seluk komunidade Manuel Barreto, hateten programa ida ne’e diak, maibe ladun iha rezultadu diak, tanba kontrolu sei minimu.
“Sira fahe roo, sira fo ikan maibe fo hanesan ne’e deit, la kontorlu, tanba ne’e mak nia rezultau ladun iha,” nia kritika.
