Vise Provedoria dos Direitus Humanus e Justisa (PDHJ), Jesuina Gomes, hateten sira konsege regista kazu violasaun boa governasaun aas liu kompara ho kazu sira seluk.
Nia hateten, iha tinan ida ne’e kazu boa governasaun ne’ebe mak tama iha PDHJ hamutuk 90 no kompara ho dadus tinan kotuk nian (2014) tinan kotuk aas liu 153.
“Husi 90 ne’e ami halo ona investigasaun 40 resin, depois ami hato’o ba instiusaun relevantes,” Vise PDHJ Gomes hateten, iha Dili.
Nia esplika, tipu violasaun ne’ebe tama iha kategoria boa governasaun mak hanesan mal administrasaun, abuzu poder, legalidade no inkompetensia.
“Mal administrasaun ne’e mak hanesan la tuir prosedimentu, atendementu publiku ladiak, uzu de poderes ne’e mak hanesan uza nia poder hodi benefisu ba nia aan, uza kareta estadu sira ne’e, enkuantu legalidade ne’e hanesan sira viola lei, prosedimentus administrative hanesan ne’e mas sira halo buat seluk,” nia esplika.
Iha parte seluk Deputada Albina Marcal, hateten dadus ne’e hatudu ba publiku katak durante ne’e iha duni violasaun lubuk ida mak akontese iha nivel ministeriu no instituisaun sira.
“PDHJ tenke halo ida ne’e hodi fo hanoin ba sira katak aktu hirak ne’e ladiak no tenke muda,” nia sujere.
Tanba ne’e nia husu ba PDHJ atu halo monitorizasaun ba mudansas ministeriu no instituisaun sira ne’ebe mak PDHJ konsege hatama ona rekomendasaun, nune’e bele hatene mundansas no progresus.
