Diretor organizasaun non govermentais (ONG) Luta Hamutuk (LH), Mericio Akara, lamentavel ho desizaun governu liu husi Ministeriu Negosiu Estrangeirus e Kooperasaun (MNEK) ne’ebe aloka $6 miloens ba sosa edifisiu embaixada nian iha Singapura.
Akara lamenta, tanba edifisiu ne’e bo’ot liu e seidauk iha nesesidade urjente hodi sosa uma iha rai Singapura.
“Ladun nesesariu ita sosa uma iha rai liur ho montante ne’ebe bo’ot $6.0 milioens ne’e,” Diretor ONG LH, Akara kestiona, iha Dili.
Tuir nia, nesesidade iha rai laran importante liu duke governu fakar osan hodi sosa deit uma ida iha Singapura ho gastus ne’ebe demaisiozu.
Nia mos husu ba governu atu esklarese razaun no vantagen saida mak Timor-Leste hetan wainhira sosa uma (edifisiu embaixada) iha Singapura.
Hatan ba kestaun ne’e Ministru Negosiu Estrangeirus e Kooperasaun (MNEK), Hernanio Coelho, katak governu halo ona kalkulu profundu ida katak gastus ba aluga uma ida karun liu duke gastus ba sosa uma ida.
“Duke ita aluga, diak liu ita sosa deit, ita sei tau embaixada permanente iha ne’eba,” Ministru Coelho hateten.
Tanba ne’e, nia dehan, tinan ne’e (2016) governu hahu tau orsamentu hodi sosa edifisiu ida iha Singapura ho preso ne’ebe ekilibru ho mobiliariu no tuir duni medida ne’ebe razoavel.
“Ami kalkula bazea ba presu merkadu ne’ebe mak oras ne’e prevelese,” nia hateten.
Nia dehan, durante ne’e governu konsege fakar osan $3,5 miloens ou $4 miloens atu selu uma aluga sira.
Nia hateten, Timor nia misaun diplomatiku iha rai liur hamutuk 33 no edifisiu embaixada ne’ebe mak Timor nian rasik mak iha Australia no tinan oin sei sosa tan iha Singapura, restu ne’e aluga deit.
