Ministru Koordenador Administrasaun Estatal Dinisio Babo, hateten programa manutensaun ba infra-estruturas baziku hahu realiza ona iha munisipiu Aileu, Ermera no Liquisa.
Ministru Babo, hateten estradas barak mak halo ona iha rai laran maibe durante ne’e seidauk halo manutensaun ida ne’ebe ho rutina, kada fulan dala ida nune’e bele dura ba tempu naruk.
“Estradas husi Dili ba Ermera no Liquisa alkatraun foun hotu ona, maibe dala ruma ita liu ba ita haree foer sira iha leten, ne’e estraga estrada, tanba ne’e ita fo kompetensia ba munisipiu ida-ida atu haree ba kestaun ne’e,” Ministru Babo hateten.
Nia dehan, programa ne’e sei hala’o uluk iha Munisipiu Aileiu Liquesa no Ermera, ho durasaun tempu tinan ida.
Nia hatutan, programa ne’e mos hetan ajudus finanseiru no fasilidade balun husi Unit Nation Development Progama (UNDP) hodi halo’o servisu ne’e.
“Sira fo osan hamutuk 50 mill no motorizada 12 hodi fo ba injineiru tekniku iha Munisipiu sira hodi halo servisu manutensaun no monitorizasaun ba Estrada sira ne’e,” Ministru ne’e hateten.
Iha parte seluk Deputada Albina Marcal, apoia tebes inisiativa governu ida ne’e atu halo manutensaun rutina ba Estrada no ponte sira nebe eziste ona.
“Manutensaun ne’e importante, atu kuida nafatin Estrada sira hodi labele a’at lalais,” Deputada Marcal hateten.
Nia mos agradese ba ajensi internasional sira ne’ebe mak oferese ona fundus, no fasilidade balun atu eleva programa ne’e bele lao ho susesu.
“Sei kuandu iha ajudus hanesan ne’e agradese tebes, ne’e hatudu kooperasaun servisu ne’ebe mak diak,” Deputada ne’e hateten.
