Presidente Asosiasaun Feto Munisipio Baucau, Regina de Sousa deklara feto pontensial munisipio Baucau preparadu ona atu compete iha elisaun suku ne’ebe sei halao tinan oin.
Nia dehan agora dadaun asosiasaun servisu hamutuk ho organizasaun feto sira atu fo kapasitasaun ba feto pontensial kada sukus iha munisipio laran hodi prepara an partisipa iha elisaun suku no asembleia municipal ne’ebe sei mai.
“Ami feto munisipio Baucau preparadu ona atu tuir elisaun sukus no elisaun seluk ne’ebe sei mai,” hateten Presidente Sousa, bainhira partisipa iha kongresu nasional feto ne’ebe realiza husi organizasaun Pyd iha Delta Nova, Dili.
Nia hatutan kapasitasaun ne’ebe feto pontensial sira hetan durante formasaun mak lideransa, administrasaun, public spiking, preparasaun kampania no seluk tan.
Nia ho opstimista deklara persentagen feto iha local sei aumenta makas kompara ho elisaun tinan hirak liu ba tanba feto pontensial barak mak preparadu no pontu atu kandidata an iha elisaun sukus tinan oin.
“Ami espera katak elisaun suku mai Baucau feto barak mak sei lidera tanba agora dadaun iha Baucau feto nain lima mak lidera hela sukus,” hateten nia.
Tuir dadus ne’ebe SEM fo sai partisipasaun feto iha nivel local kada tinan lima aumenta, maibe pursentu ki’ik tebes kompara ho nasional, tanba iha eleisaun tinan 2004 feto 1.6% sai xefe sukus, 1.1% xefe Aldeia no iha elisaun sukus tinan 2009 partisipasaun feto aumenta ba 2% feto lidera sukus no 1.8% sai xefe Aldeia
Iha parte seluk, Sekretario Estado Promosaun Sosio Ekonomia da Mulher (SEM), Veneranda Lemos Martins, rekonese kestaun ne’e, tanba ne’e SEM servisu hamutuk ho organizasaun feto sira atu kapasita no enkoraja feto potensial sira iha local hodi partisipa iha eleisaun sukus tinan oin.
“SEM asina ona akordu ida ho organizasaun Patria no Caucus, ajuda governu prepara feto sira hodi partisipa iha vida politika diak liu tan,” SE Lemos hateten.
SE mos husu feto maluk sira atu supporta no hakbi’it malu hodi partisipa diak liu tan iha vida politika intermus kuantidade no kualidade, tanba lei garantia partisipasaun feto iha vida politika, social no seluk tan.
Entretantu atual Xefe suku Soba, Francisca Monica de Fatima, pronto atu re –kandidata aan ba iha eleisaun xefe suku ne’ebe sei hala’o tinan oin hodi lidera tan suku Soba, maibe depende ba povu.
“Povu hili hau ka la’e, ida ne’e demokrasia tanba hau nia prinsipio ; hau ba la’os atu ukun maibe atu servi povu,” nia hateten.
Obstaklu ne’ebe feto sira hasoru iha area rural mak, nia dehan, la hetan supporta husi familia (la’en) hodi partisipa iha politika tanba kultura.
Nia hatutan, apoia husi familia liu –liu (la’en) importante tebes ba feto sira atu partisipa iha prosesu dezenvolvimentu hotu inklui vida politika.
