Membru Parlamentu (MP) Nasional, Deputadu David Diaz Ximenes, lamentavel ho postu polisia ne’ebe komando Polisia Nasional Timo-Leste (PNTL) monta ona iha fatin risku konflito, liu-liu iha aldeia Mate La Hotu, Beto Leste abandonado.
Nia dehan, postu polisia iha aldeia ne’e ate agora laiha membru polisia ida mak monta iha ne’eba.
“Tau tiha postu iha ne’eba maibe ema laiha, e kuaze postu polisia iha Dili laran barak mak mamuk,” Deputadu Ximenes kestiona, iha Parlamentu Nasional.
Tuir nia, lolos polisia sira tenke hela iha komunidade nia le’et, atu nune’e kazu saida deit mak mosu polisia bele atende kedas.
“Ema ida halo konflito polisia kaer kedas,” nia dehan.
Iha fatin seluk komunidade aldeia Mate Lahotu, Francisco Fernandes, hateten presiza duni koloka membru polisia iha bairo ne’e, tanba iha ne’e sempre akontese konflitu.
“Sempre iha konflito, monta polisia iha ne’e para fasil kontrola situasaun,” Fernandes sujere.
Hatan ba kestaun ne’e II Komandante PNTL, Komisariu Faustino da Costa, rekonese no iha tempu badak sei koloka membru balun iha area ne’eba.
“Ami sei koloka membru balun iha postu polisia iha aldeia mate lahotu,” Komisariu Costa hateten.
Nia informa, uluk komando konsege koloka duni membru balun iha aldeia ne’eba hodi asegura seguransa, maibe komando dada fali, tanba iha nesesidade seluk, no agora tenke monta fila fali.
