Segundu Komandante Polisia Komunitaria (POLKOM), Superintendente Helena das Dores, hateten POLKOM estabelese ona Ofisiais Polisia Eskola (OPE) hodi halo prevensaun konflitu iha eskolas inklui sensibiliza materia importante balun ba estudante sira.
Tanba nia dehan, iha alunus balun ne’ebe ba eskola buka deit mak problema, hodi baku profesores, e pior liu tan laiha disiplina.
“Entaun presiza apoiu seguransa husi OPE, hodi bele halo prevensaun ba situasaun hirak ne’e,” Superintendente das Dores hateten, iha Dili.
Alende ne’e, nia dehan, OPE mos halo sosializasaun kona ba asuntu trafiku umanu, sinais tranzito, pornografia, prostituisaun no narkoba ba estudante sira.
“Fo informasaun ba estudante sira ne’ebe ho idade minoridade atu komprende, nune’e labele halai ba buat sira ne’e,” nia hateten.
Nia hatutan, OPE hahu estabelese ona iha eskola Ensino Baziku 30 de Agusto, 28 de Novembru no Ensino Sekundaria FINANTIL, tanba eskola hirak ne’e risku ba konflitus.
“Ita ladun rona ona konflitu iha eskola hirak ne’e depois de tau OPE iha ne’eba,“ nia hateten.
Iha parte seluk Membru Komisaun B (seguransa, defeza, negosiu estrangeirus), Deputadu Duarte Nunes, apresia ho programa ne’e no iha duni nia rezultadu positive.
“Sira servisu ho diak, asegura no prevene konflito ne’ebe atu mosu iha eskola sira ne’e,” Deputadu Nunes hateten.
Maibe nia dehan, labele tau OPE iha deit eskola hirak ne’e, tau mos iha eskola hotu-hotu.
