Prezidente Grupo Feto Parlamentar Timor -Leste (GMPTL), Deputada Josefa Alvares Pereira Soares, sujere ba VI Governu Konstitusional atu fortifika leis hirak ne’ebe iha hodi kombate hahalok poligamia iha rai laran.
Tanba tuir nia, hahalok poligamia dadaun ne’e buras iha rai laran no governu tenke fo atensaun seriu ba situasaun ida ne’e, liu-liu implementasaun leis hodi ejiji responsabilidade.
“Implementasaun lei ne’e mak laiha seriedade, sei perdua malu, entaun governu tenke tau atensaun ba ida ne’e,” Deputada Soares hateten, iha Parlamentu Nasional.
Nia hatutan, ema hotu tenke luta hodi kombate poligamia iha rai laran, tanba poligamia ne’e estraga familia no nasaun.
Tuir keixa ne’ebe GMPTL simu husi feto sira, katak membrus governu balun mos involve iha hahalok poligamia (kama rua) ida ne’e.
Iha parte seluk, aktivista direitu feto, Yasinta Luijina, hateten hahalok poligamia ne’e violensia ida ne’ebe estraga familia no nasaun, tanba ne’e tenke kombate.
Nia dehan, atu kombate poligamia iha rai laran importante tenke iha seriedade atu implementa leis hirak ne’ebe ejiji responsabilidade autor sira nian.
“Sensibilizasaun kona ba lei sira ne’ebe iha ne’e importante atu sosiedade liu –liu feto sira iha konesementu katak iha lei atu proteze sira,” Lujinha hateten.
Nia hatutan, hahalok poligamia agora dadaun buras iha rai laran ne’ebe barak komete husi lideransa mane sira tan ne’e presiza promove mos parseirus lideransa hirak nian iha serimonia nasional sira.
