Prezidente Defensor Publiku, Sergio Hornai, sujere ba Parlamentu Nasional atu kria Lei Organizasaun Judisiariu Timor-Leste (LOJTL), nune’e bele defini klaru alargamentu tribunal iha munisipiu hotu.
Nia dehan, lei ne’e sei defini kona ba tribunal sira nia funsaun, atu monta iha munisipiu hotu ga tolu ne’e deit.
“Parlamentu presiza iha lei ne’ebe bele regulariza kestaun ne’e,” nia dehan iha salaun formasaun judisiariu, Kaikoli, Dili.
Atu nune’e, nia dehan, povu labele hasai kustu ne’ebe bo’ot atu ba to’o distritu ne’ebe iha tribunal.
“Pur ezemplu nia iha Lospalos, nia tenke halai mai to’o iha Baucau,” nia fo ezemplu.
Tuir nia, iha futuru presiza iha reprezentante DP iha distritu hotu, nune’e komunidade sira bele asesu hotu ba sistema judisial. “Nune’e ita bele hatene efetividade justisa ninian,” nia dehan.
Iha fatin seluk Deputada Josefa Alvares Perreira Soares, hateten ne’e ideas ne’ebe diak, maibe tenke haree mos ho rekursu humanus ne’ebe iha.
“Teknikamente ita presiza harii tribunal iha fatin-fatin, maibe depende ba rekursu humanus,” nia dehan.
Tanba tuir nia, rekrusu humanus iha Tribunal Rekursu mos sei menus hela inklui tribunal munisipal sira seluk.
