Estudantes husi Eskola Tekniku Vocasional (ETV) Dom Bosco Fatumaca, Munisipio Baucau, kexar Ministeriu Edukasaun (ME) ba Membrus Komisaun F Parlamentu Nasional, tanba sira nia diploma (ijasah) hakerek deit ho liman.
Reprezentante estudantes ETV, Domingos Perreira, hateten etudantes la asina sira nia diploma tanba ministeriu hakerek deit ho liman, maske diretor da eskola ho parte edukasaun asina tiha ona.
“Ami hakarak ami nia ijasah ne’e print uja komputador, la’os hakerek fali ho liman, to’o agora ami estudantes seidauk asina ida, tanba ne’e mak ami mai hasoru komisaun F ne’e,” Perreira hateten, iha Parlamentu Nasional.
Nia dezafia, tanba diploma hakerek ho liman sei impaktu ba estudantes, liu-liu sira ne’ebe hakarak kontinua estudu iha rai liur. “ba rai liur ne’e ijasah ne’e la legal ida,” nia dehan.
“Ho razaun ida ne’e mak ami lori kedas mai parlamentu nasional para antisipa lalais ami nia diploma, antes ami kontinua ami nia estudu iha rai liur.”
Iha parte seluk Prezidente Komisaun F (saude, edukasaun, kultura, desporto, veteranus no igualdade jeneru), Deputadu Virgilio da Costa Hornai, hateten lolos ne’e formulario ba diploma ka ijasah ne’e uniforme.
“Hau sei kontaktu ho diretor da eskola, tenke rekolha fila fali labarik sira nia diploma hodi print foun fali depois mak fo fali ba labarik sira,” Deputadu Hornai hateten.
Nia dehan, presiza haree ida ne’e, para labele fo fali konsekuensia ba sira, sira atu kontinua sira nia estudu iha rai liur labele, tanba diploma hakerek ho liman.
“Diploma ne’e buat ne’ebe mak premanente ona,” nia hateten.
Entretantu Jestor Programa Timor-Leste Coalition Of Education (TLCE), Matias dos Santos, hateten ida ne’e failansu jestaun ministeriu nian.
“Ami rekomenda ba ministeriu edukasaun, diak liu halo format ba diploma ne’ebe kompleta ho dadus,” nia rekomenda.
Nia dehan, diploma hakerek ho liman ne’e akontese ba eskola estudantes vocasional inklui eskola publiku hotu iha rai laran iha tinan lectivu 2014.
