Presidente Komisaun E ( Infra-struktura, Transporte e Comunikasaun), Pedro dos Martires da Costa konsidera Komisaun Administrativa Fundus Infrastruktura (KAFI) failha kontrola prosesu konstrusaun Ospital Referal Baucau tanba tinan hat ona obra ne’e seidauk hotu.
Membru Parlamentu ne’e lamenta tanba obra ne’e lao kleur liu no konstrusaun fisiku rasik seidauk hotu maibe gasta osan lubuk ida ona.
“Hau hanoin falta kontrolu, supervizaun no planeamentu ne’ebe diak no eskoilha sala kompania tanba kompania ne’ebe kaer laiha kapasidade finanseiru atu mobiliza ekipamentus hein deit osan husi governu,” Dehan Presidente Martires, Parlamentu Nasional iha, Dili.
Nia hatutan projeitu ne’e multi annual tanba ne’e kada tinan governu propoin orsamentu kuaze governu gasta ona orsamentu ho montante $ 5 Miloens ba konstrusaun obra ne’e maibe seidauk remata.
Nia haktuir projeitu ospital referral Baucau hanesan referensia ida ba governu iha futuru atu iha projeitu bo’ot ruma karik tenke halo planu BOQ ne’ebe diak inklui escoliha kompania ne’ebe iha duni kapasidade finanseiru atu kaer obra ne’e tuir data detline ne’ebe determina ona.
Iha parte seluk, Vice Ministra Saude, Natalia de Araujo rekuinese projeitu konstrusaun ospital referral Baucau nain mak ministerio saude maibe projeitu ne’e nia responsabilidade mak KAFI tanba KAFI mak halo kontrolu no supervizaun ba prosestu tomak.
“Konstrusaun ospital referral Baucau ne’e KAFI nia responsabilidade laos ministerio saude,” Dehan Nia.
Bainhira jornalista TDW koko konfirma asuntu ne’e ba iha membru KAFI hanesan Ministerio Obras Publikas maibe lakohi fo komentario tanba okupadu.
