Mehi Timor-Leste adezaun ba ASEAN seidauk bele realiza iha tinan oin (2015), maske governu halo ona aproximasaun ho nasaun membrus ASEAN lubuk ida ona.
Vise Ministru Negosiu Estrangeiru e Kooperasaun (MNEK), Constancio Pinto, hateten governu halo ona esforsu lubuk ida hanesan halo aprosimasaun ho nasaun ASEAN sira hodi fo garantia ba sira, katak Timor-Leste pronto.
“Hau hanoin tinan oin seidauk, depende ba membrus de estadu ASEAN nian, se tinan oin sira deside hatama ita, ita pronto atu simu,” Vise Ministru Pinto hateten, iha Palasiu Governu, Dili.
Iha enkontru entre nasaun membrus ASEAN ne’ebe Timor-Leste mos partisipa foin lalais, Vise Ministru ne’e, hateten nasaun sira ne’e foin deside deit atu TL bele partisipa iha enkontru tekniku ASEAN nian.
Tuir nia, ida ne’e hanesan progresu diak ida no espera katak iha tinan oin Timor-Leste komesa partisipa enkontru tekniku sira.
Kona ba difikuldade saida mak Timor-Leste sei infrenta hodi empede adezaun ba ASEAN, nia hateten, nasaun Singapura kestiona katak rekursu humanus ne’ebe Timor iha seidauk sufisiente.
Razaun seluk mos, nia dehan, mak kona ba osan ga moeda, sira hanoin Timor- Lesta tama ASEAN sei absorve osan husi nasaun ASEAN sira nian.
“Maibe ami hateten ba sira katak osan ne’e laiha problema ba ami,” Vise Pinto hateten.
Iha fatin seluk Deputada Josefa Alvares Soares, hateten kondisaun ida ne’e hatudu katak governante Timor nian tenke esforsu liu tan hodi hadia infra-estuturas iha rai laran.
“Hadia situasaun ekonomia rai laran, haree mos ita nia lei sira ne’e forte ga lae,” nia hateten.
Nia hatutan, lei tenke forte tanba wainhira investor sira mai atu halo investimentu ruma, haree mos ba kualidade lei no nia imlementasaun. “Asuntu sira ne’e mak presiza hadia.”
