Ministru Defeza Nasional da Republika Portuguesa, Jose Pedro Aguiar Branco, hateten sira pronto atu ajuda Timor-Leste hodi fo formasaun ba membrus Falentil-Forsa Defeza Timor-Leste (F-FDTL).
Ministru Branco, rekonese katak relasaun Timor-Leste ho Portugal durante ne’e la’o diak tebes, tanba ne’e Portugal pronto ajuda Timor-Leste iha area defeza, oinsa atu hasae kapasidade membrus F-FDTL.
“Ita ajuda malu iha parte defeza nia, tanba ne’e hau mai hasoru Ministru Defeza e Seguransa nian iha Timor-Leste,” Ministru Defeza e Seguransa Portuguesa Branco hateten, iha Palasio Governu, Dili.
Iha fatin hanesan Ministru Defeza e Seguransa, Kay Rala Xanana Gusmao, rekonese Timor- Leste nia kolabora servisu ho Portugal hahu kedas iha 2002 to’o agora, Portugal fo nia apoiu barak ona iha parte defeza nain.
“Ita presija liu mak oinsa atu hasea kapasidade ita nia forsa, tanba ne’e ita sei nafatin presija Portugal nia apoiu ida ne’e,” Xanana hateten.
Nia dehan, iha diskusaun nia laran koalia mos kona ba planu ne’ebe Portugal bele apoiu iha area defeza liu-liu iha planu longu prazu ninian.
Agora dadaun, Xanana hateten, Timor-Leste esforsu hela oinsa atu adezaun ba asean nune’e parte seguransa mos hanesan fator determinante ida.
“Oinsa atu proteze estabilidade,” Xanana hateten.
Iha fatin seluk membru Komisaun B (Seguransa, Defeza, Negosiu Estrangeiru) Cesar Valente, hateten durante ne’e nasaun barak inklui Portugal fo sira nia apoiu lubuk ida atu eleva kapasidade Forsa Timor-Leste maibe husu ba governua atu kria kondisaun.
“Kapasitadu maibe tenke apar mos ho kondisaun, atu nune’e ita bele hare nia profesionalismu servisu,” dehan deputadu Valenti iha Parlamentu Nasional.
