Ministeriu Edukasaun (ME) preokupa maka’as kona ba ezistensia eskola sira iha rai laran, tanba barak mak loke sein fo hatene ba governu.
Relasiona ho asuntu ne’e, Ministru Edukasaun, Bendito dos Santos Freitas, husu ba organizasaun Non Govermentais (NGO) sira karik iha planu atu loke eskola foun, tenke fo hatene ba Ministeriu Edukasaun.
Durante ne’e, nia dehan, NGO sira loke eskola la liu husi governu, no pior liu tan organizasaun hirak ne’ebe loke eskola ne’e sorin loke eskola no sorin halo negosiasaun.
“To’o ikus sira husik no se mak atu responsabilidade ba eskola ne’e,” Ministru Freitas preokupa, iha Dili.
Tanba ne’e,dala ida tan nia husu ba NGO sira ne’ebe hakarak loke eskola foun, tenke liu husi kanal ofisial ME nian,nune’e bele garante maibe tenke haree mos fatin ne’ebe sei loke eskola ne’e.
“Tanba ita mos haree ba numeru populasaun, infra-estruturas no materia, tanba dala barak sira mai loke eskola maibe fasilidade la kompletu,” nia kestiona.
Iha fatin hanesan Vise Prezidente Parlamentu Nasional, Deputadu Aderito Hugo, hatete buat ne’e akontese tanba Timor-Leste laiha inisiativa atu kontrola ba setor edukasaun nian.
“Labele loke eskola hanesan loke kios, maibe ho responsabilidade,” nia dehan.
Maibe nia dehan, labele bandu no governu tenke apresia ba inisiativa ida ne’e “ maibe governu tenke iha responsabilidade ba eskola hirak ne’e,”.
Tanba ne’e, nia sujere ba governu tenke regulariza ba entidades ne’ebe hakarak kontribui ba setor edukasaun hodi harii eskola, tenke iha rekizitus.
