Membru Parlamentu Nasional apresia ba servisu Polisia Nasional Timor-Leste ne’ebe konsege kaer ema nain tolu ne’ebe lori droga tama mai iha rai laran foin lalais ne’e.
Iha momentu ne’eba polisia sira konsege ema nain tolu ne’e ho volume droga sabu-sabu 1,595kg iha parte Audian nian foin lalais ne’e (5 Setembru 2014).
Prezidente Grupu Parlamentar Anti-Corupsaun (GOPAC), Deputadu Francisco Miranda Branco, hateten polisia konsege kaptura ema hirak ne’e tanba servisu hamutuk ho Polisia Intelijensia.
“Ita tenke fo apresiasaun ba Polisia Nasional Timor-Leste ho sira nia kapasidade hodi detekta droga ne’ebe ema subar iha mangeira laran,” Deputadu Branco hato’o nia apresiasaun, iha Parlamentu Nasional.
Maske nune’e, nia parte mos sei preokupa maka’as kona ba preparasaun governu hodi antisipa trafikanu no krime organizadu, atu labele uja Timor-Leste sai fatin transit hodi atinji sira nia hakarak.
Iha parte seluk Diretor Servisu Investigasaun Kriminal (SIK), Superintendente Ludgerio Madeira Lay, rekonese katak droga sabu-sabu ne’e sira subar iha mangeira laran.
“Ami detekta droga sabu-sabu 1.595 kg. Ami prende ema estranjeiru nain tolu,” nia hateten.
Operasaun kaptura suspeitus no kargo droga ne’ebe halao iha loron 5 fulan Setembro 2014 servisu ekipa kompostu husi Komando Distritu Dili, SIK hamutuk ho autoridades local sira.
Iha sorin seluk Xefe Suku Mascarenhas Mateus de Jesus, fo obrigadu ba servisu polisia nian ne’ebe konsege detekta ona droga sabu-sabu ne’e.
“Hau apresia tebe-tebes ba polisia nia esforsu, tanba ita kuandu buat ida ne’e, maka ita familia uma laran mos haree malu matan la moos, ne’e buat at,” nia dehan.
