Membru Parlamentu Nasional preokupa maka’as ho attitude administrador sub-distritu balun ne’ebe uja kareta estadu tula komunidade sira nia hare hodi hetan lukru ba nia an rasik.
Deputadu Manuel Gaspar, hateten kareta estadu ne’ebe administarador sub-distritu sira simu ne’e atu fasilita sira nia servisu.
“La’os ba tula fali komunidade sira nia hare hodi hetan lukru,” Deputadu Castro kestiona, iha Parlamentu Nasional.
Nia haktuir, akontesementu ne’e akontese iha dia 3 Julhu 2014 administrador sub-distritu Vemasse lori kareta estado hodi ba tula komunidade sira nia hare kada kareta isin ida selu hare kulit saku ida ba iha administrador.
“Hau hanoin ida ne’e attitude ne’ebe sala,” nia dehan.
Nia hatutan, atitude ida ne’e presiza atensaun imediata husi governu, tanba ne’e patrimonio estadu nian ba interese publiku, la’os ba interese privadu nian.
Iha parte seluk, Vise Primeiru Ministru Fernando Lasama de Araújo, hateten uja kareta estadu ajuda agrikultor sira ne’e sei bele tolera, maibe uja ba interese privadu, la’e.
“Tula komunidade sira nia hare hodi halo kobransa ba komunidade sira ne’e labele, tanba ne’e patrimonio estadu nian, se imi hetan ida ne’e hakerek naran fo mai hau,” Vise Lasama hateten.
