Prosesu aprendizajen iha eskola Ensino Baziku Filial (EBF) Rumbia Kaikoli la efetivu liu, tanba eskola ne’e iha deit sala de aulas neen, enkuantu total estudantes iha eskola ne’e hamutuk 920.
Diretor da Eskola EBF Rumbia, Abilio Pereira da Conceição, hateten ida ne’e hanesan preokupasaun ida ne’ebe sira infrenta durante ne’e.
“Ami nia sala de aulas mak limitadu teb-tebes, maibe numeru estudantes ne’ebe bo’ot, oinsa mak fahe sira tuir aula ho seguru,” Diretor da eskola da Conceição informa, iha Kaikoli, Dili.
Problema falta sala de aulas iha eskola ne’e, nia dehan, desde uluk kedas to’o agora, tanba falta de orsamentu atu loke tan espasu ba sala de aulas iha EBF Kaikoli ne’e.
Nia hateten, kada turma ou sala ida iha estudantes nain 60, ida ne’e tanba total estudantes barak liu, total hamutuk 920, enkuantu salas iha neen deit.
Iha parte seluk Professora EBF Rumbia, Teresa Tilman, rekonese katak sira iha limitasaun sala de aulas no to’o agora sei nafatin.
“Ami hanorin labarik sira ladun iha konsentrasaun ne’ebé diak hodi tuir lisaun ne’ebé ami prepara tiha ona atu fo ba sira,” nia hateten.
Durante ne’e, nia dehan, prosesu aprendiazajen kontinua la’o, maske ho kondisaun sala de aulas ne’ebe la favorable.
Tanba ne’e nia husu ba Ministeriu Edukasaun (ME), atu toma atensaun ba kestaun ne’e, tanba bainhira prosesu aprendizajen ne’ebe efetivu, sala ida tenke estudante nain 20 ou 30.
Entretantu Prezidente Komisaun F (edukasuan, saude, kultura, veteranus no igualdade jeneru), Deputadu Virgilio da Costa Hornai, hateten problema falta sala de aulas la’os deit iha eskola EBF Rumbia, maibe kuaze ke eskola hotu iha rai laran.
“Orsamentu atu sosa meja no kadeiras ba eskola hotu ne’ebe sei falta meja no kadeiras, iha tinan 2014 ne’e hamutuk $23 miloens,” Deputadu Hornai hateten.
Maibe nia dehan, karik iha tinan ida ne’e la konsege kompleta, ho orsamentu tinan oin nian governu bele hadia ou halo rehabilitasaun ba eskola hotu iha rai laran.
