Ezistensia rede droga ne’ebe dadaun ne’e tama no buras iha rai laran, tuir Diretor Fundasaun Mahein, Nelson Belo, katak tanba seguransa iha area tolu mak sei fraku.
Belo hateten, area tolu ne’e mak hanesan seguransa iha area maritima, aero no seguransa iha fronteiras terestres.
“Tanba ita nia frakeza sira ne’e mak halo ema tama sai ho fasil atu organiza an iha ne’e,” Diretor Fundasaun Mahein Belo hateten, iha Balide, Dili.
Belo hateten, iha maritima (Portu Dili) to’o agora seidauk fasilidade ida ne’ebe ho kualidade hodi detekta droga, iha Aero Portu rekursu humanus ne’ebe sei limitadu no laika makina atu halo deteksaun.
No frakeza seluk mak, nia dehan, fronteiras ne’ebe luan, e Polisia Nasional Timor-Leste (PNTL) liu-liu Unidade Polisia Fronteiras (UPF) mos dala ruma la perkore hotu.
Kestaun seluk mos, nia hateten, komunidade seiduak edukadu diak kona ba saida maka droga, entaun ida ne’e mos sai oportunidade ba rede droga sira ne’e fasil tama mai iha ne’e.
“Hau hanoin ne’e la’os problema PNTL deit, maibe ne’e problema nasional, ne’e duni presija politika ne’ebe rigorozu,” Diretor FM ne’e sujere.
Hatan ba kestaun ne’e Sekretariu Estadu Seguransa (SES), Francisco Guterres, hateten instituisaun PNTL iha ona ekipamentus balun ne’ebe monta iha Aero Portu Dili hodi detekta ema no sasan ne’ebe tama mai iha Timor-Leste.
“Ita haree katak iha fulan ida ne’e nia laran no fulan kotuk PNTL konsege sobu rede droga sira ne’e, ne’e hatudu progressu diak,” SE Guterres hateten.
Nia hatutan, SES, instituisaun PNTL hamutuk ho Ministeriu Justisa harii ona Sentru Investigasun Kriminal iha ministeriu justisa nia okos, ne’ebe sei toma konta ba area droga sira.
Kona ba seguransa iha fronteiras, nia dehan, polisia UPF koko maneiras oioin atu haforsa hodi evita rede droga sira ne’e.
“Haforsa rekursu umanu, hola fasilidade, no fo kapasitasaun ba membrus sira konaba droga no krimi sira seluk oinsa bele halo opersaun ba kestaun hira ne’e,” SE Guterres dehan.
